"ჩვენთვის არ არსებობს ავტორიტეტები არც პატრიარქის, არც მეფის, არც პრეზიდენტის და არც პრემიერის სახით", - ასე პასუხობს რესპუბლიკური პარტია საპატრიარქოს განცხადებას, სადაც დისკრედიტაციის ახალ ტალღაზეა საუბარი. რესპუბლიკელების თქმით, საპატრიარქომ კიდევ ერთხელ წაახალისა უთანასწორობა და ჩაგვრა:

"ნებისმიერი პირი თუ ინსტიტუცია, რომელიც არ ცნობს და არ აღიარებს თითოეული ინდივიდის თავისუფლებას, ყოველთვის იქნება ჩვენი მწვავე კრიტიკის ობიექტი."

რესპუბლიკელები აცხადებენ, რომ საქართველოს მართლმადიდებელი ეკლესია დღევანდელმა ხელმძღვანელობამ ჯერ საბჭოთა, მერე კი პოსტსაბჭოთა რეჟიმების ნაწილად აქცია:

"საპატრიარქომ იკადრა სახელისუფლო ქრთამის აღება - ეს არის ბიუჯეტის 25 მილიონი ყოველწლიურად; ეს არის ისედაც მწირი ადგილობრივი თვითმმართველობის პერმანენტული ძარცვა მიწებით, ფულით, სამშენებლო მასალით; ეს არის ენით აუწერელი სატრაპეზოებით ნებივრობა, ეს არის მუდმივად ხელგაწვდილ მდგომარეობაში ყოფნა, ეს ჩრდილოეთის პატრონთან მიმართ ზღვარსგადასული შიში და რიდიცაა."

რესპუბლიკელების თქმთ, პარტია ეფუძნება იმ ღირებულებებს, რომელთა გარეშე შეუძლებელია დემოკრატიული სახელმწიფოს პროგრესს:

"დავუპირისპირდებით ნებისმიერ სახელისუფლებო თუ არასახელისუფლებო ინსტიტუციას, რომელიც უგულვებელყოფს ადამიანის თავისუფლებას და თანასწორობას, წაახალისებს დისკრიმინაციას, ჩაერთვება კორუფციაში და ნებისმიერი სხვა ფორმით ეცდება ქვეყანა დაუბრუნოს ჩვენი სახელმწიფოს მრავალსაუკუნოვანი ინსტორიის მანძილზე ყველაზე დამანგრეველ პერიოდს - საბჭოთა ეპოქას."

საპატიარქოს მიერ, 14 მარტს გავრცელებული განცხადების თანახმად, გარკვეული ძალებისთვის მიუღებელია ეკლესიის და კათოლიკოს-პატრიარქის მალაღი ავტორიტეტი და რეიტინგი, რის გამოც მათ წინააღმდეგ მიზანმიმართული ბრძოლა მიმდინარეობს.