საქართველოს საპატრიარქოში ფიქრობენ, რომ მათი დისკრედიტაციის ახალი ტალღა იგეგმება. ამის შესახებ საპატრიარქომ საგანგებო განცხადება გაავრცელა.

საპატრიარქოში ამბობენ, რომ "გარკვეული ძალებისთვის ყოვლად მიუღებელია ეკლესიის და კათოლიკოს-პატრიარქის მალაღი ავტორიტეტი და რეიტინგი", სწორედ ამიტომ მათ წინააღმდეგ მიზანმიმართული ბრძოლა მიმდინარეობს.

"არ არის გამორიცხული, რომ ბინძური კამპანიის წარმოება განხორციელდეს უმაღლესი იერარქის მიმართაც და ამაში სასულიერო პირებიც იქნან გამოყენებულნი."

მათი განცხადებით, არის მცდელობა ეკლესია ჩართონ და გამოიყენონ პოლიტიკურ თამაშებში. საპატრიარქოში მიიჩნევენ, რომ მათი მოწინააღმდეგეებისთვის მიუღებელია ეკლესიის ღირებულებები:

"მათთვის ასევე მიუღებელია, რომ ეკლესია იცავს ოჯახის სიწმინდეს, ქვეყნის ტერიტორიულ მთლიანობას, ეროვნულ და ტრადიციულ ღირებულებებს, ზრუნავს მომავალი თაობის სწორად აღზრდისთვის; მიუღებელია, რომ ეკლესია ეწინააღმდეგება "ელგებეტე" პირთა ცხოვრების წესის ნორმად გამოცხადებას, პროტესტს უცხადებს ნარკოლიბერალიზაციის არასწორ, სახიფათო ფორმებს და აზარტული თამაშების პროპაგანდას; რომ იგი იღვწის, წმინდა მამათა მიერ დადგენილ კანონთა შესაბამისად, მართმადიდებლური სწავლების დაცვისთვის….

საპატრიარქომ მოუწოდა ეკლესიისა და ქვეყნის გულშემატკივრებს "გამოიჩინონ კეთილგონიერება, არ აყვნენ ცილისწამებებს, პროვოკაციებსა და მიზანმიმართულ ბოროტ ქმედებებს."