2018 წლის ორი თვის მონაცემებით საქართველოს აეროპორტებში მგზავრთა ნაკადი 34,38%-ით გაიზარდა.

სამოქალაქო ავიაციის სააგენტოს ინფორმაციით, 2018 წელს, 2 თვეში რეგულარული და ჩარტერული რეისების შედეგად 500 709 მგზავრი გადაადგილდა, 2017 წლის ანალოგიურ პერიოდში - 372 619.

ავიაციის სააგენტოს ცნობით, მგზავრთა ნაკადის ზრდის მაღალი მაჩვენებლები დაფიქსირდა საქართველოს სამივე საერთაშორისო აეროპორტში:

2018 წლის 2 თვის განმავლობაში, თბილისის საერთაშორისო აეროპორტი 433 202 მგზავრს მოემსახურა, რაც 37,54%-ით მეტია, ვიდრე 2017 წლის იანვარ-თებერვალში გადაყვანილი მგზავრების რაოდენობა.

ქუთაისის საერთაშორისო აეროპორტში მგზავრთა ნაკადი 6,69%-ით გაიზარდა. სულ გადაიყვანეს 48 890 მგზავრი - 3 064 მგზავრით მეტი ვიდრე 2017 წლის პირველი ორი თვის განმავლობაში.

ბათუმის საერთაშორისო აეროპორტში 18 129 მგზავრი გადაიყვანეს, რაც 67,06%-ით (7 277 მგზავრით) მეტია 2017 წლის ანალოგიური პერიოდის მაჩვენებელზე.

2018 წლის ორი თვის მონაცემებით, საერთო ჯამში, საქართველოს აეროპორტებში 470 რეისით მეტი განხორციელდა ვიდრე 2017 წლის ანალოგიურ პერიოდში.