ჯანდაცვის სამინისტროს განცხადებით, სურამის ფსიქიატრიულ საავადმყოფოში "არსებული პრობლემების ოპერატიულად აღმოფხვრისთვის" დროებითი მმართველი დაინიშნება.

უწყების თქმით, აღნიშნული გადაწყვეტილება მინისტრის განკარგულებით შექმნილმა სპეციალური მონიტორინგის ჯგუფმა მიიღო, რომელიც დაწესებულებაში დღეს იყო.

"მონიტორთა ჯგუფმა ადგილზე კლინიკური, ადმინისტრაციული და ხარისხის კონტროლის მიმართულებით არსებული ვითარება შეისწავლა. ისინი დაწესებულებაში არსებული სიღრმისეული პრობლემების დეტექციისა და ლიკვიდაციისთვის სპეციალურ რეკომენდაციებს მოამზადებენ", - ნათქვამია განცხადებაში.

სურამის ფსიქიატრიულ დაწესებულებაში არსებული მდგომარეობა წლებია სახალხო დამცველის ანგარიშებში ხვდება. მწვავე იყო 2015 წლის ანგარიშიც, სადაც პაციენტები სამედიცინო პერსონალის მხრიდან განხორციელებულ ძალადობაზე საუბრობენ.

6 მარტს სახალხო დამცველის აპარატი დაწესებულებას კიდევ ერთხელ ეწვია. ომბუდსმენის თქმით, საავადმყოფოები პაციენტები ღირსების შემლახავ პირობებში იმყოფებიან.

სურამის ფსიქიატრიული კლინიკის დირექტორმა, ვახტანგ ამირანაშვილმა "იმედის კვირის" მიერ მომზადებულ სიუჟეტში განაცხადა, რომ ქალ ბენეფიციარებს თავად აბანავებს და ჰიგიენურ პროცედურებსაც უტარებს. ამ სიტყვებით დირექტორმა ბენეფიციარების მიმართ განსაკუთრებული მზრუნველობის დადასტურება სცადა. არასამთავრობოები და სახალხო დამცველის აპარატი კი დაწესებულებაში სექსუალური ძალადობის შესაძლო ფაქტების არსებობაზე მიუთითებს.

On.ge დეტალების გასარკვევად სურამის ფსიქიატრიული საავადმყოფოს დირექტორს ვახტანგ ამირანაშვილს დაუკავშირდა. მან უარყო თავისივე სიტყვები, რომ დაწესებულებაში ბენეფიციარებს ხშირად, თავად ბანს და განაცხადა, რომ ასეთი შემთხვევა ერთხელ, წლების წინ მოხდა. მან, ასევე, პაციენტები შეურაცხმყოფელად მოიხსენია და ქვეშაფსიები უწოდა.