სახალხო დამცველის ინფორმაციით, #8 პენიტენციურ დაწესებულებაში მყოფი ერთ-ერთი ბრალდებული აცხადებს, რომ 25 ივნისს შსს-ს ვაკე-საბურთალოს სამმართველოს პირველი განყოფილების თანამშრომლებმა დააკავეს, რომელთაც არ განუმარტავთ, რომ სამართალდამცავები იყვნენ. დაკავებულის თქმით, მიუხედავად იმისა, რომ დაკავებისას მას წინააღმდეგობა არ გაუწევია, მაინც გადაუგრიხეს ხელები და დააწვინეს ასფალტზე.

აღნიშნულის გამო გამოძიების დაუყოვნებლივ დაწყების წინადადებით უჩა ნანუაშვილმა 7 ივლისს მთავარ პროკურორს მიმართა. როგორც აღნიშნულმა პირმა სახალხო დამცველის რწმუნებულს უამბო, სამართალდამცავებმა მას არაერთხელ მიაყენეს ფიზიკური შეურაცხყოფა:

"პოლიციის ერთ–ერთმა თანამშრომელმა ორჯერ ჩაარტყა იარაღის ტარი სახეში. შემდგომ, ავტომანქანაში, პოლიციის განყოფილებაში გადაყვანისას პოლიციის თანამშრომლები თავში ურტყამდნენ ხელებს და აყენებდნენ სიტყვიერ შეურაცხყოფას".

ომბუდსმენის ინფორმაციით, პენიტენციური დაწესებულებიდან მოპოვებული სამედიცინო დოკუმენტაციის შესწავლის შედეგად დადგინდა, რომ პენიტენციურ დაწესებულებაში შესვლისას ბრალდებულს ორივე თვალის ქვედა კიდურთან მოლურჯო ფერის კანქვეშა სისხლნაჟღენთი და ცხვირზე ფუფხით დაფარული ექსკორაცია აღენიშნებოდა:

"სახალხო დამცველის აზრით, შესაძლოა ადგილი ჰქონდეს ბრალდებულის მიმართ დაკავებისას არასათანადო მოპყრობას, რაც საჭიროებს დროული, ზედმიწევნითი, დამოუკიდებელი და მიუკერძოებელი გამოძიების დაუყოვნებლივ ჩატარებას, რათა დანაშაულის დადასტურების შემთხვევაში მოხდეს არასათანადო მოპყრობის ჩამდენი პირების დადგენა და მათ მიმართ მართლმსაჯულების განხორციელება".