მიხეილ სააკაშვილი მხარდამჭერებს უკრაინაში, მარშის გამართვისკენ მოუწოდებს. ფეისბუქზე გავრცელებულ განცხადებაში, სააკაშვილი ამბობს, რომ მარში კიევის გარდა ყველა რაიონულ ცენტრში და პატარა ქალაქში უნდა ჩატარდეს.

"მას შემდეგ, რაც მთელი ქვეყანა ფეხზე დადგება, ჩვენ უნდა გადავწყვიტოთ კიევში, საბოლოო მარშის თარიღი, იმისთვის რომ ფინალური დარტყმა მივაყენოთ ამ რეჟიმს"

ვიდეოგანცხადებაში სააკაშვილი კარვების ქალაქში ჩატარებულ ჩხრეკას გამოეხმაურა. მისი თქმით, ინფორმაცია იმის შესახებ რომ იქ იარაღი ინახებოდა სიცრუეა.

"კატეგორიულად ვგმობ პოროშენკოს, ავაკოვის, ლუცენკოსა და ოლიგარქიის ქმედებებს. როგორც ყოველთვის, ისინი იტყუებიან. მათ იარაღი და ხელყუმბარები თავად მიიტანეს კარვების ქალაქში. საუბრობენ იარაღის მოგროვებაზე, როდესაც მთელი ამ პერიოდის განმავლობაში ბანაკში არც ერთი სერიოზული ინციდენტი არ მომხდარა."

სააკაშვილი მხარდამჭერებს მოუწოდებს, თუკი აქამდე ათასობით იკრიბებოდნენ აქციებზე, ახლა მილიონობით გამოვიდნენ და დაანახონ ხელისუფლებას, რომ მათი არ ეშინიათ.

კარვების ქალაქში, რადას შენობასთან, 3 მარტს სამართალდამცველებსა და აქციის მონაწილეებს შორის დაპირისპირება მოხდა, რის შედეგადაც რამდენიმე ადამიანი დაშავდა. საამრთალდამცავებმა აქტივისტები დააკავეს. მათი განცხადებით, კარვების ქალაქში ჩხრეკის შედეგად ხელყუმბარები და საბრძოლო იარაღი ამოიღეს.