ეუთოს მუდმივი საბჭოს სხდომაზე არჩილ ტატუნაშვილის გარდაცვალებასა და საქართველოს ორი მოქალაქის, ლევან ქუტაშვილისა და იოსებ პავლიაშვილის დაკავებასთან დაკავშირებით იმსჯელეს. ინფორმაციას საგარეო საქმეთა სამინისტრო ავრცელებს.

უწყების განცხადებით, სხდომაზე საქართველოს მხარდაჭერა გამოუცხადეს ეუთოში ევროკავშირის, აშშ-სა და მოლდოვას დელეგაციებმა. ევროკავშირის 28 წევრი სახელმწიფოს სახელით გაკეთებულ განცხადებას ასევე მიუერთდნენ: იუგოსლავიის ყოფილი რესპუბლიკა მაკედონია, მონტენეგრო, ალბანეთი, ბოსნია და ჰერცეგოვინა, ისლანდია, ნორვეგია, უკრაინა, მოლდოვა და ანდორა.

ევროკავშირმა მოუწოდა ცხინვალში მოქმედ რეჟიმს, დაუყოვნებლივ გადასცენ ტატუნაშვილის ცხედარი თავის ოჯახს და უზრუნველყონ საქართველოს ორი მოქალაქის, ქუტაშვილისა და პავლიაშვილის დაბრუნება თბილისის მიერ კონტროლირებულ ტერიტორიაზე.

არჩილ ტატუნაშვილის ცხედარი ოსურ მხარეს თბილისისთვის 24 თებერვალს უნდა გადმოეცა, თუმცა დე ფაქტო ხელისუფლებამ პოზიცია შეცვალა.