პარლამენტში ბორჯომის მუნიციპალიტეტის საკრებულოში მიმდინარე მოვლენების განხილვას ხმაური მოჰყვა. სიტყვიერი დაპირისპირების დროს ნაციონალური მოძრაობის წევრმა, ხატია დეკანოიძემ ქართული ოცნების წევრს, ენძელა მაჭავარიანს უთხრა, რომ ბიძინა ივანიშვილისთვის მიემართა. მაჭავარიანმა დეკანოიძეს უთხრა, რომ ივანიშვილისთვის თავი დაენებებინა:

"ბიძინა ივანიშვილი შენს წონაში არ გამოდის და პირი გამოირეცხე, როდესაც ბიძინა ივანიშვილზე ლაპარაკობ. ბიძინა ივანიშვილს თავი დაანებეთ, ჩვენ გველაპარაკეთ, რა გაქვთ სათქმელი".

ფიზიკური დაპირისპირება ბორჯომის საკრებულოში

ფიზიკური დაპირისპირება ბორჯომის საკრებულოში 28 თებერვალს მოხდა, როცა საშტატო ნუსხასა და მერიის თანამშრომლებისთვის ხელფასების მატების საკითხს განიხილავდნენ.

ბორჯომის მერიის თანამშრომლები და საკრებულოს ფრაქცია ქართული ოცნების წევრები უმრავლესობაში მყოფ ოპოზიციური პარტიების წევრებს მას შემდეგ დაუპირისპირდნენ, რაც საშტატო ნუსხა საკრებულოს სხდომაზე არ დაამტკიცეს და არც ხელფასების ზრდას დაუჭირეს მხარი.

კიდევ ერთი ჩხუბი მოჰყვა საკრებულოში ერთიანი ნაციონალური მოძრაობის წევრის ნიკა მელიას გამოჩენას. მას მერიის თანამშრომლები დაუპირისპირდნენ.

სამხრეთის კარიბჭის ინფორმაციით, საკრებულოს თავმჯდომარის კაბინეტის შესასვლელი სავარძლებით ჩახერგეს, ზაზა ჩაჩანიძე, რომელიც პატრიოტთა ალიანსის წევრია და ხელფასების მატებას ეწინააღმდეგება, კაბინეტში გამოკეტეს.

დღის ბოლოს 17-მა დეპუტატმა სხდომა გამართა და 13 ხმით 3-ის წინააღმდეგ ხელფასების გაზრდის საკითხი დაამტკიცა. სხდომას ჩაჩანიძის ნაცვლად მისი მოადგილე, გიორგი გოგიჩიშვილი უძღვებოდა.

გამოცემის თქმით, სხდომის შემდეგ მერიის თანამშრომლებმა კაბინეტის შესასვლელი გაათავისუფლეს.