ამერიკის შეერთებული შტატების საელჩო პასუხისმგებელ პირებს, მათ შორის, რუსულ მხარეს მოუწოდებს სრული ინფორმაცია მიაწოდონ საქართველოს მთავრობას არჩილ ტატუნაშვილის გარდაცვალების შესახებ. ამის შესახებ საელჩოს მიერ გავრცელებულ განცხადებაში წერია.

"ასევე, ჩვენ განმეორებით მოვუწოდებთ, აღსრულდეს მართლმსაჯულება 2016 წლის მაისში, ოკუპირებული აფხაზეთის ადმინისტრაციულ გამყოფ ხაზზე მოკლული საქართველოს მოქალაქის, გიგა ოთხოზორიას მკვლელობის საქმეზე", - აღნიშნულია განცხადებაში.

ამერიკის შეერთებული შტატები ღრმად შეშფოთებულია საქართველოს მოქალაქეების ლევან ქუტაშვილისა და იოსებ პავლიაშვილის დაკავების ფაქტის გამო და მოუწოდებს დე ფაქტო ხელისუფლებას დაუყოვნებლივ უზრუნველყოს მათი თავისუფალი გადაადგილება ადმინისტრაციულ გამყოფ ხაზზე.

"ჩვენ მოვუწოდებთ ყველა მხარეს შეთანხმდნენ დამატებით ზომებზე ორმხრივი ნდობისა და გამჭვირვალობის გაძლიერებისათვის დაზარალებულ რეგიონში", - ვკითხულობთ საელჩოს განცხადებაში.