ზუგდიდის რაიონულმა სასამართლომ გაუფრთხილებლობით სიცოცხლის მოსპობაში ბრალდებული პირი დამნაშავედ სცნო და სასჯელის სახედ და ზომად 3 წლით თავისუფლების აღკვეთა განუსაზღვრა.

პროკურატურის ვერსიით, 26 ოქტომბერს, დაახლოებით 13:30 საათზე, წალენჯიხის მუნიციპალიტეტის სოფელ ფახულანში განთავსებულ შსს განსაკუთრებულ დავალებათა დეპარტამენტის საგუშაგოს ტერიტორიაზე, მოსასვენებელ ვაგონში, სწრაფი რეაგირების მე-2 ასეულის მსროლელმა "დათვალიერების მიზნით" პისტოლეტი უნებართვოდ აიღო და გაისროლა.

სროლის შედეგად დაიჭრა სწრაფი რეაგირების მე-2 ასეულის მსროლელი (ვადიანი სამხედრო მოსამსახურე) ბექა რუსია, რომელიც საავადმყოფოში გადაყვანისას გარდაიცვალა.

სამეგრელო-ზემო სვანეთის საოლქო პროკურატურის თანამშრომლებმა ბრალდებული იმავე დღეს დააკავეს.

ბექა რუსიას ოჯახი აცხადებს, რომ განაჩენს გაასაჩივრებენ. მათი მტკიცებით, იარაღს, რომლითაც ბექა რუსიას ესროლეს, ექსპერტიზა არ ჩატარებია.