თეთრი ხმაურის მოძრაობა აცხადებს, რომ ამ წუთებში პრობაციაზე მყოფი პირი ნარკოლოგიურში იძულებით ტესტირებაზე გადაჰყავთ.

თეთრი ხმაურის მოძრაობის ერთ-ერთი აქტივისტი დავით სუბელიანი On.ge-სთან საუბარში ჰყვება, რომ აღნიშნული პირი სამი თვის წინ გამოვიდა ციხიდან პირობით, ის დღეს დაიბარეს განყოფილებაში დოკუმენტაციის შეგროვების მოტივით, ადგილზე მისულს კი ბორკილები დაადეს.

თეთრი ხმაურის მოძრაობის აქტივისტთა ჯგუფი ადგილზე იმყოფება. აღნიშნულ საკითხზე On.ge შინაგან საქმეთა სამინისტროსგან პასუხს ელოდება.

განახლება: შინაგან საქმეთა სამინისტრო ფაქტს უარყოფს. პრესსამსახურის ინფორმაციით, აღნიშნული პირი განყოფილებაში მოტყუებით არ გადაუყვანიათ და მისთვის ბორკილები არ დაუდიათ. მათი თქმით, ის შემოწმების მიზნით წაიყვანეს პოლიციის განყოფილებაში და პროცედურების დაცვით გადაიყვანეს ნარკოლოგიურში. შსს-ს განმარტებით, აღნიშნულმა პირმა უარი განაცხადა ნარკოტესტირებაზე და ხელწერილის დაწერის შემდეგ გაათავისუფლეს.