პარტიზანი მებაღეების წარმომადგენლის ნატა ფერაძის განცხადებით, ვაკის გამგეობის მოპირდაპირე მხარეს, თამარაშვილის გამზირის ხეივანზე ხეებს საღ ტოტებს აჭრიან. ამის შესახებ იგი ფეისბუკის მეშვეობით ავრცელებს ინფორმაციას და ამბობს, რომ მოჭრილია ფიჭვი, ცხენის წაბლისა და კედრების ტოტები.

ადგილზე უკვე მივიდა საპატრულო პოლიცია. ნატა ფერაძე On.ge-სთან საუბარში განმარტავს რომ ახლა გრინსერვისის წარმომადგენელი მივიდა და დღეისათვის შეჩერდება ჭრა:

"პატრულმა გამოიძახა მერიის ზედამხედველობის სამსახური. ჩვენ გვაქვს ამობეჭდილი საკრებულოს სხვა ფორმირების კანონი, სადაც თვალსაჩინოა, რომ ეს ყველაფერი კანონდარღვევით ხდება".

ნატა ფერაძის ინფორმაციით, გრინსერვისს აქვს მოგებული 600 000 ლარიანი ტენდერი და გამყოფი ზოლი წყნეთის ქუჩიდან დელისამდე:

"ამბობენ, რომ ვითომ კეთილმოწყობით არიან დაკავებული. სპეციალისტი თან არ ახლავთ და მხოლოდ სამი მუშა ჭრის ელექტროხერხით".

მერიის კეთილმოწყობის სამსახურის წარმომადგენლის, შალვა მესხიას განცხადებით, სამუშაოები გამწვანების სამსახურის დაკვეთით ხორციელდება, შესაბამისი ნებართვითა და კანონის დაცვით:

"თამარაშვილის გამზირზე გამყოფ ზოლში სკვერის რეაბილიტაცია მიმდინარეობს, ხეების ქვედა ტოტები იჭერება და აქ უნდა გაშენდეს გაზონი, ყვავილები, ბუჩქები და ა.შ.".