"რაღა დროს [სანდრო] გირგვლიანია, საქართველო დაგეღუპათ უკვე," - ასე უპასუხა საქართველოს ყოფილმა პრეზიდენტმა, მიხეილ სააკაშვილმა რუსთავი 2-ის ჟურნალისტის კითხვას დაშვებულ შეცდომებთან დაკავშირებით.

"იმიტო რო გეყოთ თქვენც და ყველასაც. ამოვიდა, აი, ყელში მაქვს უკვე ამოსული ეს თემა. ამოვიდა ყელში გირგვლიანზე ლაპარაკი თავზე გემხობათ ქვეყანა და თქვენ აგრძელებთ, როგორც პატეფონები გირგვლიანზე ლაპარაკს", - აღნიშნა საკაშვილმა.

კიდევ ერთი კითხვა ჟურნალისტმა ყოფილ პრეზიდენტს გირგვლიანის საქმეზე პირების შეწყალების პოლიტიკურ გადაწყვეტილებასთან დაკავშირებით დაუსვა.

"თქვენ გყავთ ეხლა მანიაკი [ბიძინა ივანიშვილი], რომელმაც იმის შემდეგ მოკლა ასობით ადამიანი, რომელმაც გაანადგურა ქართული სპეცსამსახურები, ალპობს ციხეში საქართველოს გმირებს. გაანადგურა საქართველოს ეკონომიკა, აიძულა 700 ათასი ქართველი დაეტოვებინა საქართველო", - უპასუხა სააკაშვილმა.

რამდენიმე კვირის წინ მიხეილ სააკაშვილს თბილისის საქალაქო სასამართლომ გირგვლიანის საქმეზე სამწლიანი პატიმრობა მიუსაჯა. სასამართლომ მიიჩნია, რომ სააკაშვილმა შეწყალების კომისიის გვერდის ავლით შეიწყალა გირგვლიანის საქმეზე ბრალდებულები.