ლონდონის საკონფერენციო ცენტრ ExCel-ში, გლობალური სათამაშო ბიზნესის ყოველწლიურმა გამოფენამ, ICE Totally Gaming-მა, საქართველოში დაარსებული კომპანია სპოტკოინის დამფუძნებლის, ენდრიუ თორნჰილის გამოსვლას უმასპინძლა.

გადახდების სფეროში მოღვაწე მსოფლიო კომპანიებს შორის სპოტკოინი ერთადერთი კომპანიაა, რომელიც 2018 წლის ICE Totally Gaming-ზე ოფიციალური გამომსვლელების სიაში მოხვდა: თორნჰილის კანდიდატურა ICE Totally Gaming-ის ჟიურის წევრებმა ასობით აპლიკანტს შორის შეარჩიეს.

ენდრიუ თორნჰილმა სიტყვით გამოსვლისას სპოტკოინის მომსახურებების უპირატესობებზე და სათამაშო ინდუსტრიაში დანერგვისთვის ხელსაყრელ გადახდების გამჭვირვალე სისტემაზე ისაუბრა.

"ბლოკჩეინი რევოლუციური კონცეფციაა, რომელიც იდეალურად მიესადაგება სათამაშო და გადახდების სისტემებს. მეამაყება, რომ ICE Totally Gaming-ის 30 000 მონაწილეს შორის სპოტკოინის წარდგენის შესაძლებლობა მომეცა"

ენდრიუ თორნჰილი ფინანსური ტექნოლოგიების ექსპერტია ამერიკიდან. ის საქართველოში პირველად 2007 წელს ჩამოვიდა და ქართულ საფინანსო კომპანიებთან თანამშრომლობა დაიწყო. ფინანსური ტექნოლოგიების სფეროში 4 კონტინენტზე მოღვაწეობის შედეგად მიღებული გამოცდილება სხვადასხვა ადგილობრივი კომპანიის, სისტემის და პროგრამის განვითარებას მოახმარა, 2016 წელს კი სპოტკოინი დააარსა, რომლის ნავაჭრმაც 1 წლის განმავლობაში 5 მილიონ აშშ დოლარს გადააჭარბა.

კომპანია სპოტკოინმა მოღვაწეობა ციფრული ვალუტით ვაჭრობის სფეროში დაიწყო. დღეს კი კრიპტოვალუტის გამომუშავებით, შავი ზღვის აუზის ქვეყნებში საგანმანათლებლო პროექტებით და კრიპტოვალუტის გლობალური ონლაინ-გადამცვლელი პლატფორმის შექმნითაა დაკავებული. სპოტკოინი ტრადიციულ საბანკო სექტორსა და ციფრული ვალუტის ბაზარს შორის შემაერთებელი ხიდის ფუნქციას ასრულებს და მიზნად ისახავს, მომავლის ფინანსური ინსტიტუციები მომხმარებლებისთვის ხელმისაწვდომი გახადოს.

ამ ეტაპზე სპოტკოინს წარმომადგენლები ჰყავს საქართველოში, სომხეთში და ნიდერლანდებში, რომლებიც შავი ზღვის აუზის ქვეყნებს, დასავლეთ ევროპას და გაერთიანებული სამეფოს ქვეყნებს ემსახურება. თორნჰილის განცხადებით, სპოტკოინის მისიაა, საქართველო მსოფლიო რუკაზე მონიშნოს, როგორც ციფრული ვალუტის განვითარებისთვის ერთ-ერთი ყველაზე ხელსაყრელი ლოკაცია.

გამოფენა ICE Totally Gaming-ი ყოველწლიურად მთელი მსოფლიოს მასშტაბით სათამაშო ინდუსტრიას მასპინძლობს — როგორც ფიზიკურ, ასევე ონლაინ-რეჟიმში მოღვაწე კომპანიებს. ღონისძიება გადახდის სისტემების წარდგენის საუკეთესო პლატფორმას და სათამაშო ინდუსტრიის ე.წ სოციალურ ჰაბს წარმოადგენს, სადაც სხვადასხვა კომპანიის წარმომადგენლების შეხვედრები, სათამაშო პროდუქტების და სისტემების გაყიდვები და საგანმანათლებლო და სადებატო ფორუმები იმართება. ICE Totally Gaming-მა 2017 წელს გამართულ ბიზნეს-ღონისძიებებს შორის დამსწრეების რაოდენობით რეკორდი მოხსნა — ოფიციალურად დარეგისტრირებული მონაწილეების რაოდენობამ 30,213-ს მიაღწია.