ეუთოს საპარლამენტო ასამბლეის 25-ე სესიაზე, რომელიც საქართველოში იმართება, ქართული მხარის მიერ მომზადებულ რეზოლუციის პროექტს "კონფლიქტი საქართველოში", რომელიც ქვეყნის ტერიტორიაზე არსებულ კონფლიქტებს ეხება, რუსეთის გარდა, ყველა ქვეყანამ დაუჭირა მხარი.

რუსეთის აღნიშნული გადაწყვეტილება გამოიწვია იმან, რომ ქართული მხარის მიერ მომზადებული პროექტი ძირითადად რუსეთის მიერ ოკუპაციასა და მის მიერ ნაკისრი ვალდებულებების შეუსრულებლობას ეხება. რუსეთის დელეგაციის წევრებისთვის მიუღებელი აღმოჩნდა ყველა ის მუხლი, რომელშიც რუსეთია ნახსენები. მათ ასევ განაცხადეს, რომ დელეგაციის წევრებმა ისე დაუჭირეს მხარი დოკუმენტს, რომ ის წაკითხულიც კი არ ჰქონდათ.

იმისთვის, რომ რეზოლუციაზე საბოლოო კენჭისყრა მოხდეს, ეს პროექტი სესიაზე უნდა გავიდეს, რაც სავარაუდოდ დღის ბოლომდე მოხდება.

პარლამენტის თავჯდომარის, დავით უსუფაშვილის თქმით, აღნიშნული რეზოლუცია და მონაწილე ქვეყნები მოუწოდებენ რუსეთს, რომ დაცული იყოს საერთაშორისო პრინციპები, საქართველოს ტერიტორიული მთლიანობა და სუვერენიტეტი:

"დოკუმენტი არის უპრეცედენტოდ მკაფიო, ამიტომ მათ თქვეს, რომ შეიძლებოდა მისი ცოტა დაბალანსებაც კი. მაგრამ ყველამ ერთხმად გადაწყვიტა მხარი დაეჭირა ამ დოკუმენტისთვის, გარდა რუსეთის ფედერაციის წარმომადგენლებისა. ჩვენ ეს არ გაგვკვირვებია, რადგან ამ დოკუმენტით მსოფლიოს 56 ქვეყანა ეუბნება ერთ ქვეყანას, რომ დაიცვას ის სტანდარტები, რაც დასაცავია".