ორი მოზარდის მკვლელობის მცდელობაში ბრალდებულ არასრულწლოვანს 16-დან 20 წლამდე ან უვადო პატიმრობა ემუქრება. დღეს, თბილისის საქალაქო სასამართლომ აღკვეთი ღონისძიების სახით მას პატიმრობა შეუფარდა.

გამოძიება თავიდან 117-ე მუხლით დაიწყო, რაც ჯანმრთელობის განზრახ მძიმე დაზიანებას გულიხსმობს. თუმცა სასამართლომ მუხლი გადააკვალიფიცირა და ახლა გამოძიება მიმდინარეობს 19,109 მუხლის მეორე ნაწილი "ბ" და მესამე ნაწილის "ა" ქვეპუნქტით, რაც გულისხმობს განზრახ მკვლელობის მცდელობას წინასწარი შეცნობით არასრულწლოვნისა და ორი პირის მიმართ.

დაჭრა ე.წ. წითელი ბაღის ტერიტორიაზე

პროკურატურის განცხადებით, 31 იანვარს თბილისში, ალ.ყაზბეგის გამზირზე ე.წ. წითელი ბაღის ტერიტორიაზე თბილისის ექსპერიმენტული სკოლის მოსწავლეები ა.ნ., ლ.ხ და ბ.ა. შეხვდნენ მათ კლასელს ნ.მ.-სა და ყოფილ პარალელურ კლასელებს, ამჟამად 35-ე საჯარო სკოლის მოსწავლეებს: ნ.ც, ი.ც. და ლ.ხ. უწყების ინფორმაციით, მათ სწლის ბოლოს გასამართ ბაკეტთან დაკავშირებით უნდაა ესაუბრათ.

პროკურატურის თქმით, საუბრისას მხარეებმა ერთმანეთს სიტყვიერი შეურაცხყოფა მიაყენეს, რაც გადაიზარდა ფიზიკურ დაპირისპირებაში. ამ დროს ა.ნ.-მ სიცოცხლისთვის სახიფათო ჭრილობები მიაყენა ნ.ც.-სა და ი.ც.-ს.

სამართალდამცველებმა ბრალდებული ცხელ კვალზე, თბილისში დააკავეს. პოლიციამ დანაშაულის ჩადენის იარაღი - დანა ნივთმტკიცებად ამოიღო.