თბილისის სააქალაქო სასამართლომ სამი მოზარდის დაჭრაში ბრალდებულ არასრულწლოვანს აღკვეთი ღონისძიების სახით პატიმრობა შეუფარდა. ამის შესახებ ინფორმაცია On.ge-ს პრესსამსახურმა დაუდასტურა.

ასევე ცნობილია, რომ გადაკვალიფიცირდა 117-ე მუხლი, რომლითაც დაიწყო გამოძიება, განზრახ მკვლელობის მცდელობით. გამოძიება მიმდინარეობს 19,109 მუხლის მეორე ნაწილი "ბ" და მესამე ნაწილის "ა" ქვეპუნქტით, რაც გულისხმობს განზრახ მკვლელობის მცდელობას წინასწარი შეცნობით არასრულწლოვნისა და ორი პირის მიმართ.

პროკურორის თქმით, წარდგენილი ბრალდება განეკუთვნება განსაკუთრებით მძიმე დანაშაულის კატეგორიას. მისი განმარტებით, მუხლის გადაკვალიფიცირება საქმეში არსებულმა ახალმა მტკიცენულებებმა განაპირობა.

არასრულწლოვანი ბრალდბეულის ადვოკატმა, ირმა ჭკადუამ განაცხადა, რომ საქმეში დამატებითი მტკიცებულებები არ არის წარმოდგენილი. მისი თქმით, სასამართლოს დაუსაბუთებელი გადაწყვეტილება მიიღო და მის გასაჩივრებას აპირებს.

დაჭრა ე.წ. წითელი ბაღის ტერიტორიაზე

გამოძიების ვერსიით, 31 იანვარს ალ.ყაზბეგის გამზირზე, ე.წ. წითელი ბაღის ტერიტორიაზე, ბრალდებულმა ურთიერთშელაპარაკებისას ყოფილ თანაკლასელებს - 2000 წელს დაბადებულ ნ.ც.-ს და 2000 წელს დაბადებულ ი.ც.-ს ცივი იარაღით მუცლისა და გულმკერდის არეში თითო ჭრილობა, ხოლო 2000 წელს დაბადებულ ლ.ხ.-ს ხელზე მსუბუქი ჭრილობა მიაყენა და შემთხვევის ადგილიდან მიიმალა.

დაჭრილი არასრულწლოვნები რესპუბლიკურ საავადმყოფოში იმყოფებიან. კლინიკის პრესსამსახურმა On.ge-ს უთხრა, რომ ორივე პაციენტი მიმღებ გადაუდებელ დეპარტამენტში, დაკვირვებისა და მკურნალობის ქვეშ რჩება. მისივე თქმით მოზარდების მდგომარეობა სტაბილურია და მათ სიცოცხლეს საფრთხე არ ემუქრება.

რესპუბლიკური საავადმყოფოს ექიმის თქმით, პაციენტებს აღენიშნება გულ-მკერდის წინა ზედაპირზე, მარცხენა ნახევარში, ნაკვეთ-ნაჩხვლეტი ჭრილობა.

სამართალდამცველებმა ბრალდებული ცხელ კვალზე, თბილისში დააკავეს. პოლიციამ დანაშაულის ჩადენის იარაღი - დანა ნივთმტკიცებად ამოიღო. გამოძიება თავიდან ჯანმრთელობის განზრახ მძიმე დაზიანების ფაქტზე მიმდინარეობდა.