ვარკეთილის მეტროს ჭერის ჩამონგრევასთან დაკავშირებით, თბილისის ყოფილი მერის დავით ნარმანიას თქმით, მიღება-ჩაბარებასთან დაკავშირებულ საკითხებზე და სხვა დეტალებზე პასუხი სატრანსპორტო კომპანიამ უნდა გასცეს, რადგან როგორც ამბობს, თავად არ ახსოვს:

"მე არ მახსოვს და ვერ მემახსოვრება, იმიტომ რომ მერიაში ძალიან ბევრი მსგავსი სამუშაო წარმოებდა".

ნარმანია განმარტავს, რომ სატენდერო საკითხებს და ობიექტს თბილისის სატრანსპორტო კომპანია უწევდა ზედამხედველობას. მისივე თქმით, გამოძიებამ უნდა გასცეს პასუხი და უნდა დაისაჯონ ის პირები, რომელთა ბრალეულობაც გამოიკვეთება:

"ესეთი ფორმით რატომ გააკეთეს შეკიდული ჭერი? რამ გამოიწვია ჩამონგრევა? ეს იყო უხარისხოდ შესრულებული თუ ვიბრაცია იყო იმაზე მეტი? - ეს ყველაფერი გამოძიებით უნდა დადგინდეს".

მეტროსადგურ ვარკეთილში დაშავებულების რაოდენობა უკვე 14-მდე გაიზარდა. მერის, კახა კალაძის თქმით, დაშავებული მოქალაქეების მკურნალობის ჯანდაცვას სამინისტრო და თბილისის მერია დაფარავს.

მეტროს ინციდენტთან დაკავშირებით გამოძიება სისხლის სამართლის კოდექსის 240-ე მუხლით დაიწყო, რაც სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას გულისხმობს.