ქურდული სამყაროს წევრობის, თავისუფლების უკანონო აღკვეთის, ჯგუფურად ჩადენილი ყაჩაღობისა და ნარკოტიკული საშუალების გამოძალვის მცდელობის ბრალდებით, ექვსი პირი მეტსახელად ჩიკი, ბუბა, ამბერგუნა და კიდევ სამი სხვა პირი დააკავეს.

ამის შესახებ დღეს, 29 იანვარს, შს მინისტრის მოადგილემ ნათია მეზვრიშვილმა ბრიფინგი გამართა.

მისი თქმით, დაკავების ოპერაცია სამ სხვადასხვა ადგილზე ჩატარდა, მათ შორის თბილისში, დედოფლისწყაროსა და წნორში.

დანაშაულებრივი დაჯგუფების წევრების მიერ ჩადენილი დანაშაული 5-დან 15 წლამდე ვადით თავისუფლების აღკვეთას ითვალისწინებს.

გამოძიების ვერსიით, ჯგუფის სამმა წევრმა თურქეთში ე.წ. კანონიერ ქურდებთან შეთანხმებით რამდენიმე მოქალაქეს ქურდული გარჩევა მოუწყო და დიდი ოდენობით თანხა გამოსძალა.

შსს-ს ცნობით, ამავე პირებმა დანაშაულებრივი დაჯგუფების კიდევ ერთ წევრთან, ერთად ქურდული გარჩევის გზით, ფიზიკური და სიტყვიერი ძალადობის გამოყენებით, მათივე ნაცნობისგან მიისაკუთრეს თანხა და მისგან ნარკოტიკული საშუალების გამოძალვას ცდილობდნენ.

უწყება აცხადებს, რომ დანაშაულებრივი დაჯგუფების კიდევ ორმა წევრმა, მათთვის საინტერესო ინფორმაციის მიღების მიზნით, დატყვევებული ჰყავდათ რამდენიმე პირი.

გამოძიება ირწმუნება რომ დაკავებულები აღიარებენ ქურდულ სამყაროს და მონაწილეობას იღებდნენ ქურდულ გარჩევებში.

ასევე, აქტიური კავშირი ჰქონდათ უცხოეთში მყოფ ქართველ ე.წ. კანონიერ ქურდებთან: კაკო ტბილისკისთან, ლავასოღლისთან, ტოტორინისთან, ენცოსთან და ქურდული სამყაროს სხვა წევრებთან, რომლებისგანაც იღებდნენ დავალებებს და ქურდული სამყაროს მიერ დადგენილი წესებით მოქმედებდნენ.