აუდიტორია 115, თეთრი ხმაურის მოძრაობის მიერ ორგანიზებულ, ბახალას მხარდასაჭერ აქციას ეხმაურება და მიიჩნევს, რომ აქციის შინაარსი არ ასახავს არსებული ნარკოპოლიტიკის რეალურ პრობლემებს და მათი გადაჭრის გზებს.

დღეს ჩვენ ვიხილეთ სატელევიზიო კომერციაზე გათვლილი შოუ, რომელიც დაცლილი იყო რეალური შინაარსისგან - ნათქვამია აუდიტორიის განცხადებაში.

აუდიტორიაში მიიჩნევენ, რომ აქციის ორგანიზატორებმა ტრიბუნა არასწორად გამოიყენეს და არ ისაუბრეს ნარკოდამოკიდებულების გამომწვევ მიზეზებზე და რეგიონებში ხალხის მასობრივ შანტაჟზე. მათი განცხადებით აქციის ორგანიზატორებს არ მოუთხოვიათ სახელმწიფოსგან, რომ რეპრესიულ პოლიტიკაზე უარის თქმასთან ერთად ის ქცეულიყო კეთილდღეობის სახელმწიფოდ, რომელიც ნარკოდამოკიდებულებს დახმარებას და რეაბილიტაციას შესთავაზებდა.

განცხადებაში აღნიშნულია, რომ ორგანიზატორების გააზრებული სურვილი, ჩაახშონ იმ მოძრაობების ხმა, რომლებიც ნარკოპოლიტიკის სოციალურ ასპექტებზე საუბრობენ, კითხვის ნიშნის ქვეშ აყენებს მათ გულწრფელობას, რამაც საბოლოოდ საზოგადოებაში საკითხის მარგინალიზება შეიძლება გამოიწვიოს.

აუდიტორია 115 სოლიდარობას უცხადებს უსამართლოდ დაჭერილ პატიმრებს, თუმცა მიუღებლად მიიჩნევს პრობლემების ამ ფორმით წარმოჩენას:

"ჩვენ ვიბრძვით რეპრესიული ნარკოპოლიტიკის წინააღმდეგ, რომელიც სათავეს ეკონომიკური უთანასწორობიდან და გაჭირვებული მოქალაქეების ტერორიდან იღებს."