განახლება: კანცელარიასთან დაგეგმილი აქციის დრო და ადგილი შეიცვალა. აქცია პარლამენტის შენობასთან 6 საათზე გაიმართება.

მსახიობ გიორგი გიორგანაშვილის დაკავების გასაპროტესტებლად, თბილისში, კანცელარიასთან აქცია გაიმართება. აღნიშნულთან დაკავშირებით განცხადებას თეთრი ხმაურის მოძრაობა ავრცელებს. მოძრაობის წევრები მოითხოვენ გიორგი გიორგანაშვილის და ბექა წიქარიშვილის გათავისუფლებას და საქმეში მონაწილე პოლიციელების დასჯას :

"მოვითხოვთ: გიორგი გორგანაშვილი დაუყოვნებლივ გათავისუფლდეს საპატიმრო დაწესებულებიდან; გათავისუფლდეს მოძრაობის წევრი ბექა წიქარიშვილი; კანონის სრული სიმკაცრით დაისაჯონ საქმეში მონაწილე პოლიციელები; უმოკლეს ვადებში შეიცვალოს რეპრესიული , ფაშისტური ნარკოპოლიტიკა. მოვუწოდებთ საქართველოს პრეზიდენტს, გამოიჩინოს კეთილი ნება, გამოიყენოს საკუთარი უფლება-მოსილება და დაგვიბრუნოს გიორგი გიორგანაშვილი. სწორედ ამ მოთხოვნებს ეფუძნება აქცია ლოზუნგით - ყველა ერთისთვის! "

განცხადებაში აღნიშნულია, რომ იმ მოვლენების ფონზე, როდესაც საზოგადოებაში ვრცელდება ინფორმაცია სამართალდამცავების მხრიდან ძალის გადამეტების ფაქტზე სასამართლოს აღნიშნული გადაწყვეტილება ხელახალ ლეგიტიმაციას ანიჭებს ე.წ. ჩადებების პრაქტიკას:

"„ჩადებების“ თემა საზოგადოებისთვის ახალი არ არის. სულ ცოტა ხნის წინ, ჩვენ ვიხილეთ „ბირჟა მაფიის“ საქმე, რომელშიც ბრალდებულები ამბობდნენ, რომ მათ ნარკოტიკული საშუალებები ჩაუდეს. საქმისადმი ფართო საზოგადოებრივი ინტერესის აღძვრის შემდეგ სასამართლომ „ბირჟა მაფიის“ წევრების წინააღმდეგ საქმის წარმოება შეწყვიტა, რაც დიდი ალბათობით მიუთითებს იმაზე, რომ მათ ნარკოტიკული საშუალება მართლაც ჩაუდეს. მიუხედავად აღნიშნული გამამართლებელი განაჩენისა, შსს-ის თანამშრომლები კვლავაც აგრძელებენ უფლებამოსილების შესრულებას."

მოძრაობის წევრები აცხადებენ, რომ არ შეეგუებიან არაჰუმანურ ნარკოპოლიტიკას და სახელმწიფოს მხრიდან ნებისმიერი ძალადობის მიმართ უკომპრომისოები იქნებიან.

აქციას, რომელიც 25 იანვარს, 17:00 საათზე, კანცელარიის შენობასთან გიორგი გიორგანაშვილის მხარდამჭერებისა და მეგობრების ინიციატივით გაიმართება სხვადასხვა არასამთავრობოები უერთდებიან: თეთრი ხმაურის მოძრაობა, ტალღა, Emc • ადამიანის უფლებების სწავლებისა და მონიტორინგის ცენტრი, 2 ივნისის მოძრაობა, გირჩი / Girchi, ქალთა მოძრაობა Georgian Women's Movement, Equality Movement / თანასწორობის მოძრაობა,საფარი/Sapari.

თბილისის საქალაქო სასამართლომ გიორგი გიორგანაშვილს, იგივე ბახალას 0,3726 გრამი სუბოტექსის ფლობისთვის 8-წლიანი პატიმრობა მიუსაჯა.

პროცესის შემდეგ, სასამართლოსთან ხმაურის მოძრაობის აქტივისტი ბექა წიქარიშვილი და მსახიობი თორნიკე ბზიავა დააკავეს. თორნიკე ბზიავა უკვე გაათავისუფლეს. წიქარიშვილის საქმეზე კი გამოძიება ადმინისტრაციულ სამართალდარღვევათა კოდექსის 173-ე და 166-ე მუხლებით მიმდინარეობს, რაც სამართალდამცავის მოთხოვნისადმი დაუმორჩილებლობას და წვრილმან ხულიგნობას გულისხმობს. როგორც შინაგან საქმეთა სამინისტროში აცხადებენ, საქმე აღძრულია სისხლის სამართლის კოდექსითაც, კერძოდ, სასამართლოს შენობაში მინის გატეხვის ფაქტზე. გამოძიება 187-ე მუხლით მიმდინარეობს, რაც ნივთის დაზიანებას ან განადგურებას გულისხმობს.