ბოლო რამდენიმე დღეა, მშობლების ნაწილი ბაღებისთვის სამუშაო საათების გაზრდაზე საუბრობს. მშობლებმა ამ საკითხით ჯერ კიდევ დეკემბერში ბაღების მართვის სააგენტოს ხელმძღვანელს, კახაბერ გვანცელძეს შეხვედრისას მიმართეს.

გვანცელაძემ განაცხადა, რომ ბაღების სამუშაო დღის ექვსი საათიდან რვა საათამდე გაზრდაზე იმსჯელებდა და საკითხს დღის წესრიგში დააყენებდა.

სააგენტოს პრესსამსახურმა On.ge-ს უთხრა, რომ სამუშაო დღის გაზრდასთან დაკავშირებით მშობლებმა გვანცელაძეს დეკემბერში, შეხვედრისას მიმართეს, თუმცა კონკრეტული ნაბიჯები ჯერ არ გადადგმულა:

"ამას დასჭირდება ფინანსები და რეგულაციები, რის მიხედვით შეირჩევა პედაგოგი, რომელიც დარჩება ამ ბავშვებთან, ყველა ჯგუფი იქნება თუ ერთი ჯგუფი გაკეთდება - ეს ჯერ ორგანიზებული არ არის. [საკითხი] განხილვის ეტაპზეა, მაგრამ კონკრეტული გადაწყვეტილება ჯერ არ არის".