თბილისში, მარშალ გელოვანისა და პეტრე სარაჯიშვილის ქუჩების გადაკვეთაზე ესტაკადის მოსაწყობად ტენდერი გამოცხადდა. პროექტის სავარაუდო ღირებულება 4 307 727 ლარია.

"მარშალ გელოვანის ქუჩა წარმოადგენს ორმხრივი მიმართულების უმაღლესი კატეგორიის გზას გამყოფი ზოლით და თითოეული მიმართულებით 3 სამოძრაო ზოლით, მიუხედავად ამისა პიკის საათებში ქუჩა ძალიან გადატვირთულია და მოძრაობის სიჩქარე მკვეთრად ეცემა, მცირდება ქუჩის გამტარუნარიანობა, ამას ემატება ვაშლიჯვრის დასახლებიდან შეკრებილი სატრანსპორტო ნაკადები, რომლებიც ერთმანეთს შეერწყმებიან პ. სარაჯიშვილის ქუჩაზე და გამოდის გელოვანის ქუჩის გადაკვეთაზე ერთ დონეში, ერთი ზოლით თბილისში მიმავალი ტრანსპორტი შეერწყმება დასავლეთიდან თბილისში მომავალ ნაკადს გელოვანის ქუჩით, ხოლო დასავლეთის მიმართულებით მიმავალი სატრანსპორტო ნაკადი მრავალი საკონფლიქტო წერტილის გამო იძულებულია ელოდოს კვანძის განტვირთვას, ძალიან სწრაფად იქმნება საცობი და სატრანსპორტო ნაკადის მწკრივი გრძელდება რამოდენიმე ასეულ მეტრზე (მიუხედავად მოწყობილი შუქნიშნისა)", - აღნიშნულია თბილისის მერიის მიერ გამოქვეყნებულ სატენდერო დოკუმენტში.

ამავე დოკუმენტის მიხედვით განმარტებულია, რომ სატრანსპორტო კვანძი მჭიდროდ დასახლებულ უბანში, სახელმწიფო და კომერციული დანიშნულების ნაგებობების ზონაში ეწყობა და აუცილებელი იყო შენობების დანგრევა. ამ არგუმენტით, ცალმხრივი მიმართულების ორდონიანი სატრანსპორტო კვანძის გაკეთება გადაწყდა.

ესტაკადის აშენების შემდეგ, ვაშლიჯვრის დასახლებიდან დასავლეთის მიმართულებით მოძრავი ნაკადი ესტაკადის მეშვეობით გადაივლის გელოვანის ქუჩას. რაც შეეხება ვაშლიჯვრის დასახლებიდან თბილისისკენ მიმავალი სატრანსპორტო ნაკადს, ერთი ზოლი შეერწყმება დასავლეთიდან თბილისისკენ მიმავალ სატრანსპორტო ნაკადს გელოვანის ქუჩაზე. ახალი ესტაკადის გახსნის შემდეგ, გზის ამ მონაკვეთზე მოიხსნება შუქნიშანი და გაიზრდება გზის გამტარუნარიანობა.

ტენდერში მონაწილეობა 3 თებერვლიდან 8 თებერვლის ჩათვლითაა შესაძლებელი. გამარჯვებული კომპანია ვალდებული იქნება სამუშაოები დაიწყოს წერილობითი დავალების მიცემიდან 5 კალენდარული დღის ვადაში და დაამთავროს 180 დღეში.

ამავე თემაზე: