H&M-ის რეკლამაში მონაწილე აფროამერიკელი ბავშვის ოჯახი, უსაფრთხოების მიზნით, სტოკჰოლმის სახლიდან საცხოვრებლად სხვაგან გადავიდა, წერს BBC.

ხუთი წლის მოდელის დედა, ტერი მანგო ამბობს, რომ სოციალურ ქსელში მას ხშირად თავს ესხმიან იმის გამო, რომ H&M-ის სარეკლამო კამპანია რასისტულად არ მიაჩნია:

"მათ მიაჩნიათ, რომ გავიყიდე. მე აფროამერიკელებისა და ყველა შავკანიანის სირცხვილი ვარ. მათ ჰგონიათ, რომ შვილი ფულში გავყიდე".

მისივე თქმით, მან იცის, რომ რასიზმი არსებობს, მაგრამ აღნუშნულ წარწერაში რასისტულ მესიჯს ვერ ხედავს.

რამდენიმე დღის წინ ონლაინ მაღაზიაში შვედური ტანსაცმლის ბრენდის H&M-ის მიერ შავკანიანი მოდელის ფოტოს, რომელსაც ტანსაცმელზე "ჯუნგლების ყველაზე მაგარი მაიმუნი" ეწერა, კრიტიკა მოჰყვა.

ბრენდი რასიზმში დაადანაშაულეს. ჰუდის სტაფილოსფერი ვერსია თეთრკანიან ბავშვს აცვია, წარწერით - "ჯუნგლებში გადარჩენის ექსპერტი".

ზედაზე წარწერის გამო აფროამერიკელმა აქტივისტებმა კომპანიის რამდენიმე მაღაზიაც დაარბიეს.

H&M-მა ფოტო ონლაინ მაღაზიებიდან აიღო და Time-თან საუბრისას, საჯარო ბოდიშიც მოიხადა, თუმცა ბრენდი ჰუდებს ამერიკის გარდა სხვა ქვეყნებში მაინც გაყიდის:

"ბოდიშს ვიხდით ამ სურათის გამო. ის ჩვენი საიტებიდან უკვე ავიღეთ და ამერიკაში ამ ზედას არ გავყიდით. ჩვენ გვჯერა მრავალფეროვნების და აუცილებლად განვიხილავთ შიდა საქმიანობებს".