ეროვნულ-დემოკრატიული ინსტიტუტის უახლესი კვლევის თანახმად, გამოკითხულთა 60% საქართველოს ევროკავშირში გაწევრიანების მომხრეა, ხოლო 29% ევრაზიულ კავშირს ემხრობა.

მნიშვნელოვანია, რომ კვლევაში მონაწილე პირებს განემარტათ, რომ ევრაზიული კავშირი რუსეთის, ბელორუსისა და ყაზახეთის მიერაა დაფუძნებული, ევროკავშირი კი - დასავლეთ ევროპის ქვეყნების მიერ.

მოსახლეობის 8% არც ერთ ალიანსში გაწევრიანებას არ ეთანხმება.

ევრაზიულ კავშირში გაწევრიანებას ყველაზე მეტი მომხრე (56%) უმცირესობათა დასახლებებში ჰყავს. აქ მცხოვრები ადამიანების მხოლოდ 25% მიიჩნევს, რომ საქართველო ევროკავშრისი წევრი უნდა გახდეს.

რაც შეეხება ასაკობრივ ჯგუფებს, ევრაზიულ კავშირში გაწევრების მომხრეთა პროცენტული მაჩვენებელი იცვლება ასაკის მატებასთან ერთად.

ფოტო: NDI

UK aid-ის ფინანსური ხელშეწყობით კვლევა NDI-ის დაკვეთით CRRC საქართველომ ჩაატარა. წარმომადგენლობითი შერჩევით (ოკუპირებული ტერიტორიების გარდა) კვლევა 29 ნოემბრიდან 19 დეკემბრამდე პერიოდში ჩატარდა, პირისპირ ინტერვიუთი გამოიკითხა 2 298 ადამიანი (გამოპასუხება 48%). კვლევაში მონაწილე პირები შემთხვევითი შერჩევის მეთოდით შეირჩნენ, ცდომილება კი - 1,9 პროცენტია.