პარლამენტის თავჯდომარის, დავით უსუფაშვილის განმარტებით, ვინაიდან ეუთოს 25-ე ყოველწლიურ სესიას საქართველო მასპინძლობს, რომელმაც ეუთოს პირობა მისცა, რომ დელეგატებს, ღონისძიებაში მონაწილეობის ფარგლებში, პრობლემა არ შეექმნებათ, აღნიშნული პირობა რუსეთის დელეგაციასაც შეეხება:

"ეს ეხება რუსეთის დელეგაციასაც, ესპანეთის დელეგაციასაც, შეერთებული შტატების დელეგაცაიასაც და ყველას. კანონი თუ ვინმეს აქვს დარღვეული, კანონთან დაკავშირებით, სამართალდამცავი ორგანოები მიიღებენ კანონითვე გათვალისწინებულ ზომებს, მაგრამ ამასობაში, აქ მუშაობის პროცესში არავის ხელი არ შეეშლება".

უსუფაშვილმა განმარტა, რომ საქართველოს კანონი ოკუპირებული ტერიტორიების შესახებ მოქმედებს, თუმცა, ამ ღონისძიებაში მონაწილეობის პროცესში ხელი არავის შეეშლება, რადგან ეს საქართველოს მიერ აღებული საერთაშორისო ვალდებულებაა, რომელიც შიდა კანონმდებლობაზე მნიშვნელოვანია.

პარლამენტის თავჯდომარის განმარტებით, აღნიშნული თემით სპეკულაცია და მასთან დაკავშირებით აჟიოტაჟის ატეხვა არ არის საჭირო:

"უკვე მესმის რაღაც ტიპის კითხვები, მე ყველას გთხოვთ, ეს კითხვა დაუსვათ ბატონ გიგი წერეთელს, ეუთო-ს საპარლამენტო ასამბლეის ვიცე თავმჯდომარეს, რომელმაც ჩემთან ერთად ეუთო-ს მისცა ის პირობა, რომ ყველა ქვეყნის დელეგაცია შეუფერხებლად იმუშავებს ამ ღონისძიებაზე. თუ ეს ასე არ არის, მან ბრძანოს".

უსუფაშვილმა ასევე განაცხადა, რომ ვინაიდან საქართველო ტერიტორიული მთლიანობისა და რუსულ ოკუპაციასთან გამკლავების საკითხებში საერთაშორისო თანამეგობრობის იმედად არის, ჩვენ უნდა ვიმოქმედოთ ძალიან მჭიდროდ იმ წესების და სტანდარტების დაცვით, რასაც საერთაშორისო თანამეგობრობა გულისხმობს.