ირანში, მთელი ქვეყნის მასშტაბით მიმდინარე ანტისამთავრობო პროტესტის შედეგად, 2 იანვრის ღამეს, სულ მცირე, ცხრა ადამიანი დაიღუპა.

ირანის უზენაესი ლიდერი აიათოლა ალი ხამენეი ტვიტერის საკუთარ გვერდზე გამოეხმაურა ქვეყანაში მიმდინარე მოვლენებს:

"ბოლოს განვითარებული მოვლენებისას, ირანის მტრები გაერთიანდნენ და გამოიყენეს სხვადასხვა საშუალებები, მათ შორის ფული, იარაღი, პოლიტიკა, სადაზვერვო სამსახურები, რათა ისლამური რესპუბლიკისთვის პრობლემები შეექმნათ, მტერი ყოველთვის ეძებს საშუალებას ირანელი ხალხის ასაბუნტებლად".

ირანის სახელისუფლებო ტელევიზია აცხადებს, რომ 2 იანვრის ღამეს ექვსი დემონსტრანტი პოლიციის განყოფილებაზე თავდასხმისას მოკლეს, სადაც ისინი პოლიციის შენობაში იარაღის მოსაპოვებლად შეიჭრნენ. ქალაქ ნეჯეფაბადში, დედაქალაქ თეირანთან ახლოს, ისლამური რევოლუციის დამცველთა კორპუსის წევრი დაიღუპა.

ფოტო: Anadolu

Aljazeera-ს ცნობით, 6-დღიანი პროტესტის შედეგად, სულ მცირე, 20 ადამიანი დაიღუპა, დაახლოებით 450 კი თეირანში დააკავეს. სხვა ირანულ ქალაქებში დაკავებულთა რიცხვი უცნობია.

BBC-ს ცნობით, ირანში მიმდინარე საპროტესტო აქციები ყველაზე მასშტაბურია, 2009 წლის სადაო საპრეზიდენტო არჩევნების შემდეგ.

საპროტესტო მოძრაობა 28 დეკემბერს, ქალაქ მაშჰადში დაიწყო, გაზრდილი ფასებისა და კორუფციის გასაპროტესტებლად, თუმცა ანტისამთავრობო დემონტრაცია მთელ ქვეყანას მოედო