საქართველოს სახალხო დამცველი პროკურატურას მოუწოდებს გამოიძიოს პანკისში, 26 დეკემბერს, სპეცოპერაციის დროს დაჭრილი 19 წლის ბიჭის საქმეში სამართალდამცველთა მხრიდან ძალის შესაძლო გადამეტება:

"მნიშვნელოვანია, საზოგადოების უსაფრთხოების დაცვის პროცესში დაცული იყოს ასევე, მოქალაქეთა - სავარაუდო ეჭვმიტანილთა უფლებები. უპასუხოდ დარჩენილი კითხვები ხელს არ შეუწყობს სამართალდამცველთა მიმართ საზოგადოების ნდობის ამაღლებას."

დაჭრილის ოჯახის წევრებმა სახალხო დამცველის წარმომადგენელთან საუბრისას განაცხადეს, რომ სამართალდამცავებმა მძინარე ბიჭს საძინებელ ოთახში შესვლისთანავე ესროლეს, შედეგად, სისხლიანია მისი საწოლი და ბალიში. ოჯახის წევრთა თქმით, ხელყუმბარაც სამართალდამცავებს ეკუთვნოდა.

სახელმწიფო უსაფრთხოების სამსახურის განცხადებით, დაჭრილი პირი სამართალდამცავებისთვის წინააღმდეგობის გაწევას და ხელყუმბარის აფეთქებას შეეცადა, რის შემდეგაც მოხდა გასროლა და ახალგაზრდა მამაკაცი თავის არეში დაიჭრა.