საქართველოს სახალხო დამცველი, ნინო ლომჯარია ამბობს, რომ პოეტ ზვიად რატიანის სამართალდამცავების მხრიდან შესაძლო ცემის ფაქტს სწავლობს. მისი თქმით, მისმა წარმომადგენლებმა რატიანი წინასწარი დაკავების იზოლატორშიც მოინახულეს.

"ჩვენ არ განვიხილავთ ამ შემთხვევას, როგორც ცალკე იზოლირებულ შემთხვევას. ვფიქრობ, რომ საწყის ეტაპზევე უნდა ყოფილიყო ჩართული პროკურატურა გამოძიების საწყისი ეტაპებიდანვე და რა თქმა უნდა, მნიშვნელოვანი იქნება ამ პროცესის მაქსიმალური გამჭირვალობა, ობიექტურობა. ასეთი ფაქტების სიმრავლე კიდევ ერთხელ ცხადყოფს იმას, რომ საქართველოში აუცილებელია განხორციელდეს დამოუკიდებელი საგამოძიებო უწყების რეფორმირება," - განაცხადა ნინო ლომჯარიამ.

ზვიად რატიანი აცხადებს, რომ თამარ მეფის გამზირზე ნარინჯისფერ ქურთუკში გამოწყობილს რამდენიმე ადამიანი მიუახლოვდა და დამცინავად ჰკითხა, თუ რატომ იყო ასეთი ფერის ტანსაცმლით შემოსილი. ადვოკატის თქმით, პოეტმა მიუგო, რომ ეს მათი საქმე არ იყო, რის შემდეგაც საუბარი გამწვავდა. ამის შემდეგ შსს-ს თანამშრომლებმა რატიანს სცემეს.

შსს-ს მტკიცებით, რატიანი ნასვამი იყო, ვერ აკონტროლებდა ქცევას და ლექსიკას, იქცეოდა აგრესიულად, წინააღმდეგობას უწევდა და შეურაცხყოფას აყენებდა სამართალდამცველებს. შსს იმასაც უარყოფს, რომ პოლიციელებს ფორმა არ ეცვათ.

პოეტის მიმართ შედგენილია ადმინისტრაციული სამართალდარღვევის ოქმი. მას სამართალდამცავი ორგანოს თანამშრომლის კანონიერი მოთხოვნისადმი დაუმორჩილებლობას და ხულიგნობას ედავებიან.

სამართალდამცავების მიმართ წაყენებულ ბრალდებასთან დაკავშირებით მთავარმა პროკურატურამ უკვე დაიწყო გამოძიება. მოკვლევას აწარმოებს შინაგან საქმეთა სამინისტროს გენერალური ინსპექციაც.