შინაგან საქმეთა სამინისტროს განცხადებით, 22-23 დეკემბერს მთელი საქართველოს მასშტაბით, მათ შორის თბილისში, საპოლიციო კონტროლი და ოპერატიულ-საგამოძიებო ღონისძიებები ჩატარდა, შედეგად კი სულ დაკავებულია 69 პირი

უწყების განცხადებით, სისხლის სამართლის კოდექსით გათვალისწინებული დანაშაულის ჩადენისათვის დაკავებულია 32 პირი, აქედან ცეცხლსასროლი იარაღის უკანონო შეძენა-შენახვა ტარებისთვის - 6 მოქალაქე, ნარკოტიკების უკანონო შეძენა-შენახვისთვის კი 12. ასევე, წვრილმანი ხულიგნობისა და პოლიციისადმი დაუმორჩლებლობის ბრალდებით, დაკავებულია 37 პირი.

გარდა ამისა, სხვადასხვა დანაშაულისათვის ოთხი ძებნილი პირია დაკავებული.

შსს-ს მტკიცებით, საპოლიციო კონტროლის ფარგლებში ამოიღეს სხვადასხვა სახის ნარკოტიკული საშუალებები და 50 ცეცხლსასროლი იარაღი.

სამართალდამცავი უწყების განცხადებაში ნათქვამია, რომ ამოღებულია 33 ხელყუმბარა, 12 კაფსულ-დეტონატორი და 2 278 ცალი ვაზნა. შსს-ს ცნობით, საპოლიციო კონტროლის დროს სულ გადამოწმდა 36 330 პირი.