საქართველოს პრეზიდენტის ადმინისტრაციაში მიიჩნევენ, რომ პრეზიდენტს პარლამენტში არ ჰყავს მოკავშირეები სასამართლო სისტემის გაჯანსაღების მიმართულებით. ამის შესახებ საუბარია განცხადებაში, რომლითაც ადმინისტრაციის პრესსპიკერი ეკა მიშველაძე დღეს, მოსამართლეობის კანდიდატებთან დაკავშირებით ნაციონალური მოძრაობის განცხადებას გამოეხმაურა:

"ნაციონალური მოძრაობა, რომელმაც თავის დროზე ხელისუფლებაში ყოფნისას პოლიტიკურ დიქტატს დაუქვემდებარა ხელისუფლების უმნიშვნელოვანესი შტო, დღეს ცილს სწამებს ადამიანებს, რომელთა ბიოგრაფიაში არანაირი პარტიული კუთვნილება არ იკვეთება და შესაძლოა, სწორედ ამიტომაც არც ნაციონალური მოძრაობა და არც ქართული ოცნება, ყოველგვარი არგუმენტის გარეშე არ უჭერს მხარს პრეზიდენტის მიერ წარდგენილ, მაღალი პროფესიული ხარისხის კანდიდატებს".

მიშველაძის თქმით, პრეზიდენტმა არაერთხელ აღნიშნა, რომ მას პრალამენტში არ ჰყავს მოკავშირეები სასამართლო სისტემის განახლებასთან და გაჯანსაღების პროცესთან დაკავშირებით:

"პრეზიდენტი იმედს გამოთქვამს, რომ ამჯერად მაინც პარლამენტის წევრები კვალიფიციურად მიუდგებიან საკითხს, გაიზიარებენ მიუკერძოებელი სასამართლოს საჭიროებას და მხარს დაუჭერენ წარდგენილ კანდიდატებს".

ეკა მიშველაძემ ასევე განაცხადა, რომ დღეიდან ის რეგულარულ ბრიფინგებს იწყებს და მედიის წარმომადგენლებს ყოველ სამშაბათს, 14:00 საათზე, შეხვდება.

ნაციონალური მოძრაობა რამდენიმე კვირაა საპარლამენტო საქმიანობას ბოიკოტს უცხადებს, ისინი შემსრულებლების გარდა, კორცხელის ინციდენტის ორგანიზატორთა დასჯას ითხოვენ.