უკრაინის გენერალურმა პროკურორმა, იური ლუცენკომ ჩას პიკთან მიცემულ ინტერვიუში განაცხადა, რომ თუ ოდესის ყოფილი გუბერნატორი, მიხეილ სააკაშვილი ნებაყოფლობით არ დატოვებს ქვეყანას, მას ექსტრადიცია ელის.

"ყველაფერი მის გადაწყვეტილებაზე არის დამოკიდებული. სააკაშვილს ჯერ კიდევ აქვს შანსი საქართველოში ნებაყოფლობით დეპორტაციას დათანხმდეს, წინააღმდეგ შემთხვევაში მის მიმართ კანონიერი ზომები გატარდება. მეორე ვარიანტად, მისი ექსტრადიცია განიხილება".

ჟურნალისტის კითხვაზე, თუ რის საფუძველზე გაათავისუფლეს სასამართლოს დარბაზიდან სააკაშვილი, ლუცენკომ უპასუხა, რომ არ არსებობს სისტემა, რომელსაც ყველა სასამართლო ემორჩილება. გენერალურმა პროკურორმა აღნიშნა, რომ სასამართლოს გადაწყვეტილებას არ იზიარებს და მას სააპელაციოში გაასაჩივრებს.

მიხეილ სააკაშვილი კიევში პირველად 5 დეკემბერს დააკავეს, თუმცა მომხრეებმა ის სპეცრაზმელების ავტომობილიდან დაიხსნეს. მოგვიანებით, ის 9 დეკემბერს ხელმეორედ დააკავეს, პროკურატურამ კი მისთვის ელექტრო სამაჯურის გამოყენებით შინაპატიმრობა მოითხოვა, რაც 11 დეკემბრის სასამართლო სხდომაზე არ დაკმაყოფილდა.

უკრაინის ხელისუფლება ამტკიცებს, რომ სააკაშვილმა, ხელისუფლების დამხობის მიზნით, დაფინანსება მიიღო უკრაინის ყოფილი ხელისუფლების წარმომადგენლებისგან, რასაც საქართველოს მესამე პრეზიდენტი და უკრაინული ოპოზიციური პარტიის ლიდერი აბსურდულს უწოდებს. ის უკრაინის მთავრობას პოლიტიკურ დევნაში ადანაშაულებს. მისი პოლიტიკური მოძრაობა პრეზიდენტ პოროშენკოს გადადგომის მოთხოვნით კიევში აქციებს მართავს.

უკრაინის პროკურატურამ მიხეილ სააკაშვილს ბრალი სამი მუხლით წაუყენა: უკრაინის-ის სსკ 256-ე მუხლის მე-2 ნაწილით (დანაშაულებრივი ჯგუფის მხარდაჭერა და დახმარება, რომელიც ჩადენილია არაერთგზის), მე-15 მუხლის პირველი ნაწილით (დანაშაულის ჩადენის მცდელობა) და 28-ე მუხლის მეორე ნაწილით (სისხლის სამართლის დანაშაული, რომლის ჩადენაც პირთა ჯგუფის მიერ წინასწარ იყო დაგეგმილი).