"დედაქალაქის მთავრობა დანაშაულის ნიშნების შემცველ ფაქტებს რეაგირების გარეშე არ დატოვებს", - ამის შესახებ თბილისის ვიცე-მერმა ირაკლი ხმალაძემ ქრთამის აღების ბრალდებით, კრწანისის გამგეობის სამხედრო განყოფილების წამყვანი სპეციალისტის დაკავებასთან დაკავშირებით განაცხადა.

ვიცე-მერის განცხადებით, დედაქალაქის მთავრობა მერიის სისტემაში დანაშაულებრივი ქმედებისა და კორუფციის ფაქტებს არ დაუშვებს და ყველა მოხელის მიმართ, ვინც არაკანონიერ ქმედებას ჩაიდენს, შესაბამის ზომებს გაატარებს.

ირაკლი ხმალაძემ მოუწოდა მერიის თანამშრომლებს, ბოროტად ნუ გამოიყენებენ დაკავებულ თანამდებობებს.

სახელმწიფო უსაფრთხოების სამსახურის თანამშრომლებმა, ქრთამის აღების ბრალდებით კრწანისის რაიონის გამგეობის სამხედრო განყოფილების წამყვანი სპეციალისტი დააკავეს.

გამოძიების ვერსიით, დაკავებულმა, 25 წლის ასაკს მიღწეულ საქართველოს მოქალაქეს, სამხედრო სავალდებულო სამსახურის გადავადებაში დახმარების სანაცვლოდ ქრთამის სახით 1000 ლარის გადახდა მოსთხოვა.