ერთიანი ნაციონალური მოძრაობა თავიანთი პარტიის ლიდერის, მიხეილ სააკაშვილის თავისუფლების მოთხოვნით ხელმოწერების შეგროვებას იწყებს. ამის შესახებ პარტიის პოლიტსაბჭოს თავმჯდომარემ, ნიკა მელიამ მელიამ ბრიფინგზე განაცხადა.

"მიხეილ სააკაშვილის პოლიტიკური დევნა დემოკრატიასთან აბსოლუტურად შეუსაბამოა. ამგვარი ქმედება განსაკუთრებულად აღმაშფოთებელია ქართველი და უკრაინელი ხალხის ისტორიული მეგობრობის და პუტინის რუსეთთან ერთობლივი ბრძოლის ფონზე", - აღნიშნა მელიამ და დასძინა, რომ სააკაშვილს უკრაინის პროკურატურამ პოლიტიკური დევნის მიზეზით წარუდგინა ბრალი.

მისი თქმით, ქართულ და უკრაინულ "ოლიგარქიულ რეჟიმებს" სააკაშვილის პოლიტიკური ველიდან ჩამოშორება სურს.

"მოგიწოდებთ ყველას ვისთვისაც ძვირფასია ორი ქვეყნის თავისუფალი და დემოკრატიული მომავალი, მოვითხოვოთ უკრაინისა და საქართველოს ხელისუფლებისგან, შეწყდეს მიხეილ სააკაშვილის პოლიტიკური დევნა და გათავისუფლდეს ის უკანონო პატიმრობიდან გათავისუფლდეს. ჩვენს მკაცრ პოზიციებზე დამოკიდებული როგორც ჩვენი ქვეყნების ევროპული მომავალი, ასევე მთელ პოსტსაბჭოთა სივრცეში ანტიდემოკრატიული და ავტოკრატიული ტენდენციების შეჩერება", - განაცხადა მელიამ.

მიხეილ სააკაშვილი უკრაინაში მეორედ რამდენიმე საათის წინ დააკავეს. პირველად კი ის 5 დეკემბერს დააკავეს. 5 დეკემბრის დილიდან გენერალური პროკურატურა და უსაფრთხოების სამსახური, საქართველოს ყოფილი პრეზიდენტის ბინას ჩხრეკდა. ჩხრეკის გამო ის შენობის სახურავზე ავიდა და გადმოხტომით იმუქრებოდა.

სახურავზე ყოფნისას, სააკაშვილი უკრაინის მოსახლეობას მოუწოდებდა, რომ ქუჩაში გამოსულიყო და ამ უსამართლობას წინ აღდგომოდა. ამ მოწოდების შემდეგ, სააკაშვილის ბინასთან მისი მხარდამჭერები შეიკრიბნენ და სპეცრაზმის ავტომობილიდან დაიხსნეს. საქართველოს მესამე პრეზიდენტი 5 დეკემბრის შემდეგ კიევის ცენტრში, კარვების ქალაქში იმყოფებოდა, მასზე კი ძებნა იყო გამოცხადებული.

უკრაინის ხელისუფლების ცნობით, სააკაშვილის ბინაში ჩხრეკა მის მიერ ორგანიზებული მიტინგების წინა ხელისუფების მიერ დაფინანსებას უკავშირდება. სააკაშვილი ბრალდებებს აბსურდულს უწოდებს.