ევროპული საქართველოს წევრი ოთო კახიძე, პარლამენტის დეპუტატის, შოთა შალელაშვილის განცხადების და სახელმწიფო უსაფრთხოების სამსახურში მის დაბარებას ეხმაურება და აცხადებს, რომ პარლამენტის წევრი სარგებლობს თავისუფალი მანდატით და მას უფლება აქვს დააფიქსიროს საკუთარი აზრი:

"საზოგადოებამ და პოლიტიკურმა სპექტრმა კიდევ ერთხელ ნათლად დაინახა ქართული ოცნების მმართველობის უკიდურესად მახინჯი სახე, როდესაც პარლამენტის წევრის განცხადების საპასუხოდ დეპუტატი დაიბარეს სახელმწიფო უსაფრთოხების სამსახურში და დაუსვეს კითხვები ამ განცხადების ირგვლივ".

კახიძის განცხადებით, სახელმწიფო უსაფრთოხების სამსახური და აღმასრულებელი ხელისუფლების სხვა უწყებები არიან ანგარიშვალდებულები პარლამენტის წევრების წინაშე და არა პირიქით.

ოთო კახიძე მოუწოდებს საპარლამენტო უმრავლესობას, რომ რეაგირების გარეშე არ დატოვონ ეს ფაქტი:

"ეს კიდევ ერთხელ აჩვენებს, რომ ქვეყანაში არის არაფორმალური მმარეთველობა, სადაც პარლამენტის უფროსები არიან სუსის წარმომდგენლები".

პრემიერ-მინისტრი გიორგი კვირიკაშვილი დეპუტატ შოთა შალელაშვილის წერილს გუშინ, 7 დეკემბერს, მთავრობის სხდომის შემდეგ გამოეხმაურა და განაცხადა, რომ უმრავლესობის ფარგლებში ასეთი საჯარო წერილებისა და განცხადებების მიწერა პრემიერ-მინისტრისთვის მისთვის მიუღებელი ფორმაა.

უმრავლესობის დეპუტატმა შოთა შალელაშვილმა ფეისბუკზე პრემიერ-მინისტრს ღია წერილით მიმართა და აშშ-ს მსგავსად იერუსალიმის ისრაელის დედაქალაქად აღიარებისკენ მოუწოდა.