უკრაინის შინაგან საქმეთა მინისტრმა არსენ ავაკოვმა განაცხადა, რომ ოდესის ექს-გუბერნატორი და ახალი ძალების მოძრაობის ლიდერი კანონს უნდა დაემორჩილოს და წაყენებულ ბრალდებას პასუხი უნდა გასცეს.

"ნებისმიერი კონფლიქტის გადაწყვეტა მხოლოდ სამართლის გზით შეიძლება - სანამ სასამართლოს გადაწყვეტილება არ იქნება - გამოსავალს ვერ ვიპოვით. სააკაშვილი ვალდებულია კანონის მოთხოვნებს დაემორჩილოს, სამართლებრივი პროცედურები გაიაროს და წაყენებულ ბრალდებებს გასცეს პასუხი და არ გამოიწვიოს სისხლისა და დაპირისპირების პროვოცირება", - დაწერა ავაკოვმა ტვიტერზე.

დაკავებული მიხეილ სააკაშვილი თავისმა მხარდამჭერებმა სპეცრაზმის ბლოკირებული მანქანიდან გადმოიყვანეს.

დღეს, 5 დეკემბერს, კიევში საკუთარ ბინაში მიხეილ სააკაშვილი დააკავეს. დილიდან გენერალური პროკურატურა და უსაფრთხოების სამსახური, საქართველოს ყოფილი პრეზიდენტის ბინას ჩხრეკდა. ჩხრეკის გამო ის შენობის სახურავზე ავიდა და გადმოხტომით იმუქრებოდა.

იუკრაინის გენპროკურორის, იური ლუცენკოს თქმით, სააკაშვილს ბრალი ედება მძიმე დანაშაულში უკრაინის სახელმწიფოს წინააღმდეგ. ლუცენკოს განმარტებით, სააკაშვილის საპროტესტო აქციების მიზანი ხელისუფლების დამხობა იყო და მისი გუნდი ფინანსებოდა იანუკოვიჩის წარმომადგენლების მიერ. უკრაინელი სამართალდამცავების ცნობით, ექს-გუბერნატორდს ნახევარი მილიონი აშშ დოლარი გადასცა რუსულმა მხარემ.