საქართველოს პრემიერმინისტრის პრესსამსახურის ინფორმაციით, 2017 წლის ბოლოს, თბილისის საერთაშორისო აეროპორტში ჩამოსულ მგზავრებს ახალი მოფრენის ტერმინალი მოემსახურებათ.

ახალი ტერმინალის მშენებლობა დღეს დაიწყო, რომელსაც გიორგი კვირიკაშვილიც ესწრებოდა.

პრემიერის თქმით, მოფრენის ტერმინალის მშენებლობა დაგეგმილზე ადრე იწყება, რაც ტურიზმის მაჩვენებლების ზრდით არის განპირობებული:

„ბოლო თვეების განმავლობაში ჩვენ გვაქვს 25%-ზე მეტი ზრდა დაფიქსირებული, რაც შენარჩუნდება და დიდი ალბათობით შეიძლება იყოს კიდევ უფრო მაღალი მაჩვენებლები. ამიტომ, TAV Georgia იწყებს მოფრენის ახალი ტერმინალის მშენებლობას“ - განაცხადა გიორგი კვირიკაშვილმა.

ფოტო: საქართველოს პრემიერმინისტრის პრესსამსახური

კვირიკაშვილის თქმით, ტავ ჯორჯია არის ტავ ჰოლდინგის შვილობილი კომპანია, რომელიც მსოფლიოში ერთ-ერთი უმსხვილესი აეროპორტების ოპერატორი კომპანიაა და თავის ფრანგ პარტნიორთან ADP-სთან ერთად 40-მდე აეროპორტს მართავს.

„ტავ ჰოლდინგმა უკვე განახორციელა 100 მილიონ დოლარზე მეტი ინვესტიცია თბილისის და ბათუმის საერთაშორისო აეროპორტებში. სააეროდრომო ინფრასტრუქტურის განვითარებაში და ტერმინალის გაფართოება-მშენებლობაში განხორციელდება ჯამში 60 მილიონ დოლარამდე დამატებითი ინვესტიცია“ - აღნიშნა პრემიერმა.

ფოტო: საქართველოს პრემიერმინისტრის პრესსამსახური

ახალი მოფრენის ტერმინალის ფართობი 12 ათასი კვადრატული მეტრი იქნება. მშენებლობაზე დასაქმდება 500-მდე ადამიანი.

თბილისის საერთაშორისო აეროპორტის განვითარების პროექტი არსებული ასაფრენი ზოლის, სამიმოსვლო ბილიკების რეაბილიტაციას, ახალი მოფრენის ტერმინალის 5 ახალ სადგომს და მგზავრთა ხიდით უზრუნველყოფას მოიცავს.

ახალი ტერმინალის მშენებლობა 2017 წლის ბოლოს დასრულდება, რის შემდეგაც თბილისის საერთაშორისო აეროპორტი წელიწადში 3 მილიონ ხუთასი ათას მგზავრს მოემსახურება.