ბათუმის საქალაქო სასამართლომ გაიზიარა ბრალდების მხარის მტკიცებულებები და მთვრალ მდგომარეობაში ჩადენილი ტრანსპორტის მოძრაობის უსაფრთხოების წესის დარღვევისთვის ბრალდებულს 6 წლით თავისუფლების აღკვეთა განუსაზღვრა.

პროკურატურა აცხადებს, რომ 2016 წლის 31 ოქტომბერს, მთვრალ მდგომარეობაში მყოფი თ.ზ. ბათუმში, გ.ტაბიძის ქუჩაზე "მერსედესის" მოდელის ავტომობილს მართავდა, რა დროსაც დაარღვია საგზაო მოძრაობის შესახებ საქართველოს კანონი და "ოპელის" მოდელის ავტომობილს შეეჯახა. ავტოსაგზაო შემთხვევის შედეგად "ოპელის" მძღოლი საავადმყოფოში მიყვანიდან რამდენიმე საათში გარდაიცვალა.

2017 წლის 31 იანვარს თ.ზ.-ს ბრალდება დაუსწრებლად წარუდგინეს. მას აღკვეთის ღონისძიების სახედ პატიმრობა შეეფარდა და გამოცხადდა ძებნა. სამართალდამცველებმა თ.ზ. 2017 წლის 12 ოქტომბერს სარფის საბაჟო საკონტროლო გამშვებ პუნქტზე დააკავეს.