თავდაცვის მინისტრმა თინა ხიდაშელმა, მედიასთან შეხვედრის დაწყებამდე, რუსთავი 2-თან ინტერვიუში განაცხადა, რომ საქართველოს არანაირი MAP-ის მსგავსი დოკუმენტი არ სჭირდება, რადგან უკვე არსებობს ნატო-საქართველოს ერთობლივი პაკეტი.

ეს განცხადება მინისტრმა ნატო-ვარშავის სამიტის მოლოდინებთან დაკავშირებით გააკეთა.

ხიდაშელის თქმით, ნატო-საქართველოს პაკეტი ყველაზე უფრო მაღალი ხარისხის დოკუმენტია, რაც კი ნატოსა და რომელიმე ქვეყნის ურთიერთობაში ოდესმე შექმნილა.

"არანაირი MAP-ის მაგვარი, არავითარი დოკუმენტი ჩვენ არ მოგვითხოვია და შესაბამისად, არც ამის მოლოდინი გვაქვს. ჩვენ ვითხოვეთ კონკრეტული პროექტები, კონკრეტული რესურსებით, რაც ძალიან მნიშვნელოვანია, როგორც ფინანსური, ასევე ადამიანური რესურსებით. იმ მიმართულებებში, რაც დღეს საქართველოსთვის სასიცოცხლოდ მნიშვნელოვანია, იქნება ეს ზღვის მიმართულება, თავდაცვა, ავიაცია თუ სხვა, უნდა ვიცოდეთ ვისგან რა ტიპის დახმარებას უნდა ველოდეთ, რა ვადებში და რა იქნება ფაზები, როდესაც ეს პროცესი დასრულდება".

საქართველოს თავდაცვის მინისტრი ქართული და უცხოური მედიასაშუალებების წარმომადგენლებს ხვდება. თინათინ ხიდაშელმა ჟურნალისტებს ერთწლიანი საქმიანობის ანგარიში ჩააბარა.