ქართული ოცნების წევრის, სოფო კილაძის თქმით, იმის მიუხედავად, რომ მნიშვნელოვანია ვინ იყვნენ 21-22 ნოემბერს ჩატარებული სპეცოპერაციის დროს ლიკვიდირებული პირები, გამოძიების დასრულებამდე განცხადებებისგან თავი უნდა შეიკავონ. ამის შესახებ ადამიანის უფლებათა დაცვის კომიტეტის თავმჯდომარემ სპეცოპერაციის დროს აჰმედ ჩატაევის შესაძლო მკვლელობასთან დაკავშირებით დასმულ კითხვას უპასუხა.

"არაერთხელ გვსმენია არაერთი ჭორი სხვადასხვა საკითხებთან მიმართებით და მგონია, რომ ამ შემთხვევაშიც [აჰმედ ჩატაევის შესაძლო ლიკვიდაცია] საქმე გვაქვს გადაუმოწმებელ ინფორმაციასთან. რა თქმა უნდა, საზოგადოებისთვის მნიშვნელოვანია ვინ არიან ეს ადამიანები, ვინც ასეთი წინააღმდეგობა გაუწია სამართალდამცავ სტრუქტურებს, მაგრამ, რა თქმა უნდა, ყველაფერს აქვს თავის დრო და დღესდღეობით მიმდინარეობს შესაბამისი ღონისძიებები სამართალდამცავების მხრიდან. ვფიქრობ, რომ სანამ არ დასრულდება ეს ღონისძიებები, იმისთვის რომ საფრთხე არ შეექმნას გამოძიებას, თავი უნდა შევიკავოთ მსგავსი განცხადებებისგან", - განაცხადა კილაძემ.

თურქული პრო-სახელისუფლებო მედიასაშუალება Daily Sabahინფორმაციას ავრცელებს, რომლის მიხედვითაც, თბილისში, 21-22 ნოემბრის სპეცოპერაციის შედეგად მოკლულია ტერორისტული ორგანიზაცია ისლამური სახელმწიფოს მებრძოლი აჰმედ ჩატაევი. Daily Sabah ეყრდნობა სხვა თურქულ გამოცემა Haberturk-ს. Haberturk ვარაუდობს, რომ მოკლულებს შორის აჰმედ ჩატაევია, თუმცა არ ასახელებს, საიდან აქვს აღნიშნული ინფორმაცია.

21-22 ნოემბრის სპეცოპერაციის შედეგად, დაიღუპა ერთი სპეცრაზმელი და დაჭრილია ოთხი სამართალდამცავი. სახელმწიფო უსაფრთხოების სამსახურის ცნობით, ლიკვიდირებულია დანაშაულებრივი ჯგუფის სამი წევრი. სუს-ში On.ge-ს არ უთხრეს სპეცოპერაციის დროს აჰმედ ჩატაევი მოკვდა თუ არა.

სპეცოპერაციის გამო მიმდებარე ტერიტორიიდან ევაკუირებული იყო მოსახლეობა, სკოლასა და სამ ბაღში კი სასწავლო პროცესი შეწყდა. სპეცოპერაციის შესახებ არაერთი მნიშვნელოვანი დეტალი და გარემოება ამ დრომდე უცნობია.