22 ნოემბერს Facebook-მა ახალი ფუნქციის დამატების შესახებ გაავრცელა ინფორმაცია. კომპანიის ცნობით, მომხმარებლებს შეეძლებათ გაიგონ ეცნობოდნენ თუ არა ისინი რუსეთში არსებული ე.წ. ტროლების ფაბრიკის მიერ გავრცელებულ ინფორმაციასა და პოსტებს.

ახალი ფუნქცია ფეისბუკის "დახმარების ცენტრის" სექციაში დაემატება. ამ სექციაში იქნება რუსული ტროლების, იმ გვერდებისა თუ ექაუნთების ჩამონათვალი, რომლის გამომწერიც იყო კონკრეტული მომხმარებელი. ინფორმაციის გაცემა მხოლოდ 2015 წლის იანვრიდან 2017 წლის აგვისტოს მონაკვეთს შეეხება.

"მნიშვნელოვანია მომხმარებლებმა გაიგონ თუ როგორ ცდილობდნენ უცხოეთიდან დაეთესათ უნდობლობა და ჩამოეგდოთ განხეთქილება საზოგადოებაში ფეისბუკის მეშვეობით".

აღნიშნული ფუნქცია წლის ბოლოს დაემატება. 2017 წლის სექტემბერში კომპანიამ გაავრცელა ინფორმაცია რუსული ტროლების ფაბრიკის შესახებ. კომპანიის ცნობით, საუბარია დაახლოებით 3 ათას ყალბ ექაუნთზე. ამერიკის კონგრესის საგამოძიებო კომიტეტმა რუსეთის ჩარევის დამადასტურებული სხვადასხვა დოკუმენტაცია შეაგროვა, მათ შორის, ასობით ყალბი ფეისბუკის ექაუნთი, რომელიც რუსეთშია დარეგისტრირებული.

ყალბი ექაუნთების მიერ გავრცელებულ ინფორმაციას, კონგრესის ცნობით, 126 მილიონი ამერიკელი გაეცნო. რუსული ტროლების მიერ გავრცელებული ინფორმაცია ძირითადად რასობრივ და რელიგიურ ნიადაგზე კონფლიქტების გაღვივებას უწყობდა ხელს. ასევე გავრცელდა ინფორმაცია იმის შესახებ, რომ აღნიშნული ტროლების ორგანიზებით აშშ-ში წინასაარჩევნო პერიოდში არაერთი საპროტესტო აქცია გაიმართა.

აღნიშნულ ბრალდებებს სრულად უარყოფს რუსული მხარე.

"ჩვენ ყურადღებით ვადევნებთ თვალს არჩევნებს დასავლეთში, თუმცა არასდროს არ ჩავრეულვართ", - განაცხადა რუსეთის პრეზიდენტმა, ვლადიმერ პუტინმა.