არასამთავრობო სექტორი საქართველოს პარლამენტს სახალხო დამცველის ოთხ კანდიდატს წარუდგენს. კანდიადტები არიან: კონსტიტუციონალისტი ვახუშტი მენაბდე, ჟურნალისტი ზვიად ქორიძე, იურისტი ანა ნაცვლიშვილი და ასევე იურისტი ნინო ლომჯარია.

კანდიდატების შესარჩევად ორგანიზაციების წარმომადგენლები საპარლამენტო უმრავლესობას შეხვდნენ. დღეს, 23 ნოემბერს, შეხვედრის დაწყებამდე, გაზეთ რეზონანსის რედაქტორმა, ლაშა ტუღუშმა ჟურნალისტებთან საუბრისას თქვა:

"ეს არის ჩვენი შეჯერებული ოთხი კანდიდატი. რაც შეეხება მეორე ნაწილს, პროცესთან დაკავშირებით გვაქვს წინადადებები. ამ ოთხ კანდიდატს ვთავაზობთ მთლიანად პარლამენტს. ასეთ პროცედურას არ ითვალისწინებს, თუმცა მნიშვნელოვანია, რომ პროცესი იყოს ღია და დემოკრატიული".

არასამთავრობოებთან შეხვედრას ესწრებოდნენ პარლამენტის თავმჯდომარე ირაკლი კობახიძე და პარლამენტის ვიცე-სპიკერი თამარ ჩუგოშვილი.

საქართველოს მოქმედ სახალხო დამცველს, უჩა ნანუაშვილს უფლებამოსილება 7 დეკემბერს ეწურება.