ნაციონალური მოძრაობის წევრი, ზაზა ბიბილაშვილი ამბობს, რომ ისანში სპეცოპერაცია დიდი ხნის დაწყებული იყო, როცა მიმდებარე სკოლიდან და საბავშვო ბაღიდან მოსწავლეების ევაკუაცია დაიწყეს. ამის შესახებ ბიბილაშვილმა გადაცემა არჩევანში ისაუბრა.

"დაახლოებით 20 საათის შემდეგ, მას შემდეგ, რაც დაიწყო სპეცოპერაცია, ხელისუფლების წარმომადგენელი გვეუბნება, რომ მიმდინარეობს იმ ადამიანების იდენტიფიცირება, ვის წინააღმდეგაც მიმდინარეობს ეს სპეცოპერაცია. შემდეგ კეთდება განცხადება, რომ სამი თვეა, თუ სამი კვირაა ამ ადამიანებზე მიმდინარეობს თვალთვალი. მარტივი ორი კითხვაა: ნუთუ, ამ ადამიანებმა მოახერხეს, რომ აავსეს იმ არსენალით, რომლითაც პრაქტიკულად 24 საათი ასობით სპეცრაზმელს უწევდნენ შეიარაღებულ წინააღმდეგობას, შეიძლებოდა თუ არა ამის აღკვეთა; რატომ არ იყო შესაძლებელი ეს ადამიანები აეყვანათ საყოფაცხოვრებო, უწყინარ სიტუაციაში", - თქვა ბიბილაშვილმა.

ბიბილაშვილი დაეთანხმა ყოფილ თავდაცვის მინისტრს, თინა ხიდაშელს და თქვა, რომ ხელისუფლების წარმომადგენლები ურთიერთგამომრციხავ ინფორმაციას ავრცელებდნენ სპეცოპერაციასთან დაკავშირებით.

თბილისში, ისანში, გაბრიელ სალოსის ქუჩაზე, სპეცოპერაცია დაახლოებით ექვსი საათის წინ დასრულდა. ისანში სპეცოპერაცია თითქმის 20 საათზე მეტ ხანს ტარდებოდა, რა დროსაც დაზიანდა რამდენიმე საცხოვრებელი სახლი.

სახელმწიფო უსაფრთხოების სამსახურის ინფორმაციით, თბილისში, ისანში, გაბრიელ სალოსის ქუჩაზე, სპეცოპერაციის დროს დაკავებულია ერთი პირი და ლიკვიდირებულია სამი. უწყებაში აღნიშნავენ, რომ სპეცოპერაციის დროს გარდაიცვალა ერთი სპეცრაზმელი და დაიჭრა - ორი. გარდა ამისა, დაჭრილია შინაგან საქმეთა სამინისტროს ორი თანამშრომელი.