საავტომობილო გზების დეპარტამენტის ინფორმაციით, თბილისი-სენაკი-ლესელიძის საავტომობილო გზის 143–ე კმ-ზე მდებარე რიკოთის საავტომობილო გვირაბში, რამდენიმედღიანი პროფილაქტიკური სამუშაოების ჩატარების გამო, ავტოტრანსპორტს დღის გარკვეულ ნაწილში მოძრაობა შეეზღუდება.

კერძოდ, 27, 28, 29 და 30 ივნისს, ღამის 12 საათიდან დილის 7 საათამდე გვირაბში იკრძალება ყველა სახის ავტოტრანსპორტის მოძრაობა, რომელიც გადართული იქნება რიკოთის საავტომობილო გვირაბის შემსავლელ გზაზე. დღის დანარჩენ პერიოდში ავტოტრანსპორტის მოძრაობა თავისუფალია.

უწყების ცნობით, დროის ამ პერიოდში რიკოთის გვირაბის შემსავლელ გზაზე 2 სხვადასხვა ადგილას უზრუნველყოფილი იქნება საბუქსირე მექანიზმების მორიგეობა.