თბილისის ბაგა-ბაღების მართვის სააგენტოს ახალმა ხელმძღვანელმა, კახაბერ გვანცელაძემ თბილისის მერიაში იმ პრიორიტეტებზე ისაუბრა, რის განხორციელებასაც თანამდებობაზე მუშაობის დროს გეგმავს.

მის პრიორიტეტებში მოხვდა: თანამედროვე სტანდარტების ინტეგრირება ბაღებში, ახალი ბაღების მშენებლობა, ინკლუზიური განათლება და ბაღების ინსტიტუციური განვითარება.

"დღეს ჩემი პირველი სამუშაო დღეა. შესაბამისად, ყველა პრობლემაში გავერკვევი. აქედან გამომდინარე, კონკრეტულ გეგმებსა და ამოცანებს დავისახავ", - აღნიშნა გვანცელაძემ.

გვანცელაძე ამ თანამდებობაზე დანიშვნამდე მერიის ეკონომიკური განვითარების საქალაქო სამსახურს ხელმძღვანელობდა. მან თბილისის ბაგა-ბაღების მართვის სააგენტოს ხელმძღვანელის თანამდებობაზე თემურ თორდინავა შეცვალა, რომელმაც თანამდებობა პირადი განცხადების საფუძველზე კახა კალაძის პირველივე სამუშაო დღეს, 13 ნოემბერს დატოვა.