საქართველოს საელჩო უკრაინაში აცხადებს, რომ უკრაინის უსაფრთხოების სამსახურის ცნობით, საქართველოს რვა მოქალაქე იძულების წესით დააბრუნეს სამშობლოში, "საქმიანობისათვის, რომელიც ეწინააღმდეგება უკრაინის ეროვნული უსაფრთხოების უზრუნველყოფის ინტერესებს".

როგორც საელჩო აცხადებს, სწორედ აღნიშნულით ხსნის უკრაინული მხარე დაბრუნებასთან დაკავშირებული ინფორმაციის ნაკლებ დეტალიზაციას.

საქართველოს საელჩო აგრძელებს უკრაინულ მხარესთან ინტენსიურ კომუნიკაციას და ელის, რომ საქართველოს მოქალაქეთა სამშობლოში დაბრუნების პროცესში, მაქსიმალურად იქნება დაცული ყველა სამართლებრივი ნორმა და საქართველოს მოქალაქეების უფლებები.

როგორც საელჩოს განცხადებაშია ნათქვამი, 17 ნოემბერს, უკრაინიდან საქართველოს რვა მოქალაქის სამშობლოში იძულების წესით დაბრუნებაზე ინფორმაციის მიღებისთანავე, მათ დაუყოვნებელი კომუნიკაცია დაამყარეს უკრაინის საგარეო საქმეთა სამინისტროსთან, ასევე ყველა სხვა პროფილურ უწყებასთან.

უკრაინიდან დეპორტირებულებს ოჯახის წევრები თბილისის საერთაშორისო აეროპორტში მთელი ღამის განმავლობაში უშედეგოდ ელოდნენ. მათ ოჯახის წევრები უკვე მესამე დღეა, უშედეგოდ ეძებენ.