თბილისის საქალაქო სასამართლო მიიჩნევს, რომ სახალხო დამცველი ე.წ. ციანიდის საქმეზე ანგარიშში თავისი კომპეტენციის ფარგლებს გასცდა. ომბუდსმენს მიაჩნია, რომ გამოძიების პროცესში დაშვებულმა დარღვევებმა სასამართლოს საბოლოო გადაწყვეტილებაზე გადამწყვეტი გავლენა იქონია. ანგარიშის საპასუხო ანგარიში სასამართლომ დღეს, 16 ნომებრს გაავრცელა.

სასამართლოში მიაჩნიათ, რომ ნანუაშვილმა უფლებამოსილების ვადის ამოწურვის ეტაპზეც კი "ვერ განსაზღვრა სახალხო დამცველის საქმიანობისა და კომპეტენციის ფარგლები".

"სამართლებრივად უსუსური ანგარიში, არ არის პირველი შემთხვევა, როდესაც უჩა ნანუაშვილი სასამართლოს კომპეტენციაში იჭრება და სუბიექტური მოსაზრებებით და პოპულისტური განცხადებებით საზოგადოების დეზინფორმირებას ცდილობს", - ვკითხულობთ განცხადებაში, სადაც აღნიშნულია, რომ ომბუდსმენის მიერ სასამართლოს გადაწყვეტილების შინაარსში შესვლა არაკონსტიტუციურია.

ამავე განცხადებაში აღნიშნულია, რომ საქართველოს კანონმდებლობით, მოსამართლე თავის საქმიანობაში დამოუკიდებელია და გადაწყვეტილებას იღებს, ფაქტობრივი გარემოებების შეფასების, ასევე საქართველოს კონსტიტუციის, საერთაშორისო სამართლის საყოველთაოდ აღიარებული პრინციპებისა და ნორმების, სხვა კანონების შესაბამისად და თავისი შინაგანი რწმენის საფუძველზე.

"მოსამართლისგან განსხვავებით, სახალხო დამცველი არ არის უფლებამოსილი საკუთარი შეხედულებები და შეფასებები თავს მოახვიოს საზოგადოებას და იმსჯელოს მასზე, როგორც ობიექტურ რეალობაზე, იმის გათვალისწინებით, რომ სასამართლო სხდომებს არა პირადად, არამედ მისი წარმომადგენელი ესწრებოდა", - მიაჩნიათ სასამართლოში.