საქართველოს ახალგაზრდა იურისტთა ასოციაციის ინფორმაციით, ირაკლი ხოფერიას მიმართ შესაძლო წამების საქმეზე სასამართლომ პროკურატურას გამოძიების განახლება დაავალა. თბილისის საქალაქო სასამართლომ გააუქმა თბილისის პროკურორის დადგენილება და ხოფერიას დაზარალებულის სტატუსი აღუდგინა.

საიას მიაჩნია, რომ გამოძიება უშუალოდ მთავარ პროკურატურას უნდა გადაეცეს, რადგან თბილისის პროკურორის მხრიდან პოლიციელების ჩვენების მიმართ მიკერძოება გამოვლინდა. მათივე თქმით, პროკურატურამ უგულებელყო მტკიცებულებები, რომელიც პოლიციელთა მხრიდან დანაშაულის ჩადენას მიუთითებს.

სტუდენტი ირაკლი ხოფერია ვაკე-საბურთალოს პოლიციის სამმართველოს 4 თანამშრომელს წამებაში ადანაშაულებს. მისი თქმით, 2017 წლის 16 თებერვალს პოლიციელებმა დანაშაულის აღიარების მიზნით სცემეს.

საიას თქმით, 2017 წლის 2 მაისს მიღებული განჩინებით ირაკლი ხოფერია, რომელსაც პროკურატურა დაზარალებულად ცნობაზე უარს ეუბნებოდა, თბილისის საქალაქო სასამართლომ დაზარალებულად მიიჩნია.

"მიუხედავად იმისა, რომ დაზარალებულმა მოძალადე პოლიციელები ამოიცნო, პასუხისგებაში არავინ მიცემულა. საიამ არაერთხელ მოუწოდებდა შესაბამის ორგანოებს, დროულად ჩაეტარებინათ ყველა საგამოძიებო მოქმედება და პასუხისგებაში მიეცეთ მოძალადე პოლიციელები", - ნათქვამია განცხადებაში.

ორგანიზაციის თქმით, საქმის მთავარმა მოწმემ მოულოდნელად ჩვენება შეცვალა და ამასთან დაკავშირებით მათ ცალკე გამოძიების დაწყება მოითხოვეს, მოწმეზე შესაძლო არასათანადო გავლენის მოხდენაზე, თუმცა გამოძიება არ დაწყებულა.