საქართველოს ახალგაზრდა იურისტთა ასოციაციის აზრით, ამირან კვირიკაშვილის თვითმკვლელობამდე მიყვანის საქმის შსს-ს მიერ გამოძიება ეჭვქვეშ აყენებს გამოძიების დამოუკიდებლობასა და ეფექტურობას, რადგან საქმეში პოლიციის შესაძლო ბრალეულობა იკვეთება. ამ გარემოების გამო საია მიიჩნევს, რომ საქმე პროკურატურას უნდა გადაეცეს.

ოჯახის ინფორმაციით, კვირიკაშვილმა თავი შსს-ში დაკითხვის შემდეგ მოიკლა. ისინი პოლიციელების მხრიდან გარდაცვლილზე ფსიქოლოგიურ ზეწოლაზე საუბრობენ.

საია-ს ინფორმაციით, არსებობს იუსტიციის მინისტრის 2013 წლის ბრძანება, რომელიც ადგენს, რომ პოლიციელთა მიერ სავარაუდოდ ჩადენილი დანაშაული პროკურატურამ უნდა გამოიძიოს. ასევე, ადამიანის უფლებათა ევროპული სასამართლოს დადგენილი პრაქტიკით, როდესაც არსებობს გონივრული ეჭვი, რომ დანაშაული სახელმწიფო ხელისუფლების წარმომადგენლებმა ჩაიდინეს, ეფექტური და დამოუკიდებელი გამოძიების ჩატარება საქმის სხვა უწყების მიერ გამოძიებას გულისხმობს.

ამ ეტაპზე საქმეს შსს-ს გენერალური ინსპექციის გამომძიებლები სწავლობენ, სისხლის სამართლის კოდექსის 115-ე მუხლით (თვითმკვლელობამდე მიყვანა) გათვალისწინებული დანაშაულისათვის.