საუდის არაბეთმა და რეგიონში მისმა მოკავშირეებმა, ქუვეითმა და არაბეთის გაერთიანებულმა საამიროებმა თავიანთ მოქალაქეებს ლიბანის ტერიტორიის დატოვება და ქვეყანაში მოგზაურობა უბრძანეს.

"ლიბანში მიმდინარე სიტუაციიდან გამომდინარე, სამეფო თავის მოქალაქეებს, რეზიდენტებსა თუ ვიზიტორებს, რაც შეიძლება სწრაფად დატოვონ ლიბანი. მოქალაქეებს, ასევე, ვურჩევთ არ იმოგზაურონ ლიბანში", - განაცხადა საუდის არაბეთის საგარეო საქმეთა სამინისტრომ.

CNN-ის ცნობით, ეს პირველი შემთხვევა არაა, როდესაც საუდის არაბეთმა თავის მოქალაქეებს ლიბანის დატოვება სთხოვა, თუმცა მაშინ ამას მოქალაქეების უსაფრთხოებით ხსნიდა. ამ შემთხვევაში სამეფოს ბრძანების მიზეზი არ განუმარტავს.

წინა კვირაში, საუდის არაბეთმა ლიბანი მის წინააღმდეგ ომის გამოცხადებაში დაადანაშაულა. სამეფოს მიაჩნია, რომ ლიბანის მთავრობაში ირანის მხარდაჭერილი ჰეზბოლას წევრები არიან.

ერთი კვირის წინ ლიბანის პრემიერ-მინისტრმა საად ჰარირიმ საუდის არაბეთის დედაქალაქიდან მოულოდნელად გადადგომის შესახებ განაცხადა. ჰარირიმ სატელევიზიო მიმართვაში ირანი რეგიონში ინტერვენციაში დაადანაშაულა.